ایک اور دوست ڈاکٹر ذوالفقار مرزا کے دور میں پیپلزپارٹی نے خود مشکل حالات میں ڈالا۔ ذوالفقار مرزا نے عزیر بلوچ (لیاری کے ایک گینگ کا سربراہ) کو ایم کیو ایم کے مبینہ عسکریت پسندوں کے خلاف استعمال کیا۔ گزشتہ دو ماہ سے عزیر بلوچ کی کوئی خبر نہیں ہے،کراچی آپریشن کے بعد وہ فرار ہوگیا تھا ، لیکن دبئی کے قریب سے گرفتار ہوگیا، لیکن اب وہ کہا ں اور کس کی تحویل میں ہے ؟ ذوالفقار مرزا سمجھتے ہیں کہ عزیر بلوچ بہت کچھ جانتا ہے اور انہیں اس کے مقدر کے حوالےسے خدشات ہیں۔ بینظیر بھٹو کے قتل کی سازش جس پرابھی تحقیقات جاری ہیں، یہ دھماکا خیز خبر پورے ماحول میں سنسنی پیدا کرسکتی ہے۔ 27دسمبر2007کو ان پر جان لیوا حملے کےلیے مالی اور لاجسٹک معاونت فراہم کی گئی۔ مقامی حملہ آوروں کی مدد سے انہیں قتل کرنے کا الزام القاعدہ پرعائد کیاجاتاہے، لیکن اس سازش میں ہونے والی تازہ تحقیقات سے کچھ نئے عناصر سامنے آئے ہیں جنہوں نے مبینہ طور پر مالی معاونت فراہم کی، ان میں سے کچھ مارے جاچکے ہیں یا ڈرون حملوں کا نشانہ بن چکے ہیں۔ یہ بات بھی کہنا ابھی قبل از وقت ہے کہ اس کیس کی تحقیقات کا اونٹ کس کروٹ بیٹھے گا ، کیونکہ کچھ گرفتار مشتبہ افراد کا ٹرائل بھی حتمی مراحل میں داخل ہوگیا ہے اور استغاثہ کے ایک گواہ امریکی شہری مارک سیگل بھی ہیں، وہ بینظیر بھٹو کے قریبی دوست ہیں اور ویڈیو لنک کے ذریعے بیان ریکارڈ کرانےپر رضامند ہوچکے ہیں۔دہشت گردی کی مالی معاونت کی اصطلاح کو خصوصاً سیاستدانوں کے سیاق و سباق میں کراچی آپریشن کے آغاز سے قبل تک سنانہیں گیاتھا۔