اسلام آباد (نیوزڈیسک)آل پاکستان مسلم لیگ کے چیئر مین اور سابق صدر جنرل ریٹائرڈ پرویز مشرف کے خلاف سنگین غداری کیس میں خصوصی عدالت کی جانب سے سابق وزیراعظم شوکت عزیز، جسٹس ریٹائرڈ عبدالحمید ڈوگر اور سابق وزیر قانون زاہد حامد کو شریک ملزم نامزد کرنے کے فیصلے کے خلاف درخواستوں کی سماعت(آج)منگل کو اسلام آباد ہائی کورٹ میں ہو گی۔اسلام آباد ہائی کورٹ کے جسٹس نور الحق قریشی اور جسٹس عامر فاروق پر مشتمل دو رکنی بنچ سابق صدر جنرل ریٹائرڈ پرویز مشرف کے خلاف سنگین غداری کیس کی سماعت کرنے والی خصوصی عدالت کے 21 نومبر کے فیصلے کے خلاف درخواستوں کی سماعت کرے گا۔ سابق وزیراعظم شوکت عزیز، جسٹس ریٹائرڈ عبدالحمید ڈوگر اور سابق وزیر قانون زاہد حامد نے خصوصی عدالت کے اس فیصلے کو چیلنج کر رکھا ہے جس میں عدالت نے پرویز مشرف کی جانب سے ان کے ساتھیوں کو شریک ملزم بنانے کی درخواست جزوی طور پر منظور کرتے ہوئے درخواست گزاروں کے خلاف وفاق کو ترمیمی شکایت داخل کرانے کی ہدائت کی تھی۔