لاہور(نیوزڈیسک)عوامی مسلم لیگ کے سربراہ شیخ رشید احمد نے کہا ہے کہ نندی پور کا معاملہ بالآخر شہباز شریف تک جائے گا ،کرپشن کرنے والوں کی طرف سے رینجرز کے اقدامات کو آئین و قانون کے خلاف قرار دینے والے بتائیں کیا انہوںنے آئین و قانون کے دائرے میں کرپشن کی تھی ،آرمی چیف جنرل راحیل شریف کی پذیرائی کو پسند نہیں کیا جارہا ،جتنا آرمی چیف کو جانتا ہوں وہ مدت ملازمت میں توسیع نہیںلیں گے اور نہ ہی نواز شریف انہیں توسیع دیں گے ۔ ایک انٹر ویو میں شیخ رشید احمد نے کہا کہ نواز شریف اپنے لوگوں کو بچانا چاہتے ہیں لیکن اس میں بھی تفریق ہے ، اگر سعید رفیق اور کچھ دیگر کا نام آبھی جائے تو کہا جائے گاانکوائری کر لولیکن اگر خواجہ آصف اور شاہد خاقان تک نوبت آئی تو نواز شریف لڑ پڑیں گے۔ انہوں نے کہا کہ خورشید شاہ کو اپنے بارے میں سب معلوم ہے ، انہیں آصف علی زرداری نہیں بلکہ نواز شریف بچا رہے ہیں ۔ انہوںنے کہا کہ پبلک اکاﺅنٹس کمیٹی کا چیئرمین قائد حزب اختلاف کو بنا دیا جاتا ہے ایسا ہو سکتا ہے کہ کوئی شخص اپنی سابقہ حکومت کا احتساب کرے ۔ انہوں نے سندھ میں احتساب کی کارروائی کے سوال کے جواب میں کہا کہ کیا پولیس ایسی کارروائی کر سکتی ہے پہلے بھی یہی ملک تھا کیوں نہیں کچھ کیا گیا اور اس کا دائرہ وسیع ہونا چاہیے ۔ جن لوگوںنے کرپشن کی ہے انہیں پھکی ملنی چاہیے ۔انہوں نے کہا کہ یہاں پیسٹری کھانے والوں کو پکڑا جاتا رہا ہے لیکن اب بیکری چوری کرنے والوں تک معاملہ جائے گا ۔ نندی پور کا معاملہ جہاں سے شروع یا ختم ہو بالآخر بات شہباز شریف تک جائے گی ۔ انہوںنے لیگوں کے اتحاد کے حوالے سے سوال کے جواب میں کہا کہ مجھے دو مرتبہ بلایا گیا لیکن میں نے نہیں گیا میرے خیال میں موجودہ حالات میں لیگوں کے اتحاد کی نہیں بلکہ اپوزیشن کے اکٹھے ہونے کی ضرورت ہے ۔