اسلام آباد (نیوزڈیسک)محکمہ موسمیات نے کہا ہے کہ اسلام آباد اور راولپنڈی سمیت ملک کے مختلف علاقوں میں (آج ) ہفتہ سے آئندہ 4 روز کے دوران کہیں کہیں بارشیں متوقع ہیں محکمہ موسمیات کے مطابق ہفتہ سے منگل کے دوران خیبر پختونخواہ(مالاکنڈ، ہزارہ، پشاور، مردان، کوہاٹ، بنوں، ڈی آئی خان ڈویژن)، فاٹا، اسلام آباد، پنجاب(راولپنڈی، گوجرانوالہ، لاہور، سرگودھا، فیصل آباد، بہاولپور، ساہیوال، ملتان، ڈی جی خان ڈویژن)، سندھ(میرپور خاص، سکھر، شہید بینظیر آباد، حیدرآباد ڈویڑن)، گلگت بلتستان اور کشمیر میں کہیں کہیں بارش کا امکان ہے۔جنوبی پنجاب میں کپاس کی کاشت کے علاقوں میں بھی اتوار سے منگل کے دوران بارش کی پیشنگوئی کی گئی ہے۔ اتوار سے منگل کے دوران سکھر، میرپور خاص، بہاولپور، ساہیوال، لاہور اور گوجرانوالہ ڈویژن اور کشمیر میں چند مقامات پر موسلادھار بارش کا بھی امکان ہے۔آئندہ 24گھنٹوں کے دوران ملک کے بیشتر علاقوں میں موسم گرم اور خشک رہے گا تاہم میرپور خاص، مالاکنڈ ڈویڑن، کشمیر اور گلگت بلتستان میں چند مقامات پر گرج چمک کے ساتھ بارش کا امکان ہے۔ گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا۔ جمعہ کو ملک میں سب سے زیادہ درجہ حرارت تربت میں 44 ڈگری سینٹی گریڈ جبکہ سبی، لسبیلا، چھور 43، نورپورتھل، رحیم یار خان 42، مِٹھی، شہید بینظیر آباد، کوٹ ادو، بھکر میں 41 ڈگری سینٹی گریڈ ریکارڈ کیا گیا۔