اسلام آباد(نیوز ڈیسک)ایم کیو ایم کے رہنما رشید گوڈیل کی سیکورٹی کے مدنظر لیاقت نیشنل ہسپتال میں سیکورٹی بڑھا دی گئی ، رشید گوڈیل کی حالت پہلے سے بہت بہتر ہے وہ ملنے والوں کو پہچان رہے ہیں۔تفصیلات کے مطابق لیاقت نیشنل ہسپتال میں زیر علاج ایم کیو ایم کے رہنما رشید گوڈیل کی سیکورٹی میں اضافہ کر دیا گیا ہے اور ہسپتال میں پولیس کی بھاری نفری تعینات کر دی گئی۔پولیس کے مطابق نفری میں اضافہ اعلیِٰ حکام کے احکامات کے بعد کیا گیا ہے۔ ہسپتال کے اندر اور باہر چار موبائلیں اور 20 سے زائد اہلکار تعینات کئے گئے ہیں۔ماہر ڈاکٹرز کا سترہ رکنی بورڈ کا اجلاس ہوا جس میں رشید گوڈیل کی مجموعی صحت میں پیشرفت کا جائزہ لیا گیا۔ لیاقت نیشنل ہسپتال کے ترجمان انجم رضوی نے میڈیا کو بریفنگ میں بتایا کہ ڈاکٹرز نے رشید گوڈیل کی صحت پر اطمینان کا اظہار کیا۔ان کی حالت پہلے سے بہت بہتر ہے ، وہ ذہنی طور پر تندرست ہیں اور ملنے والوں کو پہچان رہے ہیں ، آج کسی وقت رشید گوڈیل کو منہ کے ذریعے لکویڈ خوراک دی جائے گی ، اس کے بعد ان کی جسمانی حالت جانچ کی جائے گی۔