پشاور(نیوزڈیسک)پشاورکی احتساب عدالت نے کرپشن اور اختیارات کا ناجائز استعمال کرنے کے الزام میں گرفتار سابق وزیر مال سید مرید کاظم کو15روزہ جوڈیشل ریمانڈ پر جیل بھیج دیا سابق وزیر کو پروٹیکٹیو جوڈیشل ریمانڈ ختم ہونے کے بعد بدھ کے روز نیب کی خصوصی عدالت کے جج محمد ابراہیم خان کے رو برو پیش کیا گیا ۔قومی احتساب بیورو خیبر پختونخوانے سابق صوبائی وزیر مال سید مرید کاظم کو محکمہ مال کے تین افسران سمیت پاک نیوی کے خاندانوں کےلئے مختص 1976کنال اراضی کی غیر قانونی منتقلی کے الزام میں 3اگست کو گرفتار کیا تھا جنہوں نے کرپشن اور اختیارات کا ناجائز استعمال کرتے ہوئے سال 2010 میں 182کنال زمین کو غیر قانونی طور پر اپنے رشتہ داروں اور محکمہ کے افسران کے نام کرلیا تھا جس سے سرکاری خزانے کو کروڑوں روپے نقصان پہنچا ہے احتساب عدالت کی جانب سے ملزم کو 13اگست کوپروٹیکٹیو جوڈیشل ریمانڈ پر 6 دنوں کے لئے جوڈیشل لاک اپ منتقل کر دیا تھا۔ریمانڈ ختم ہونے پر ملزم کو گزشتہ روز احتساب عدالت میں پیش کیا گیا جہاں پر فاضل عدالت نے ملزم کو 15روزہ جوڈیشل ریمانڈ پر جیل منتقل کرنے کے احکامات جاری کر دیئے۔