لاہور(نیوزڈیسک)لاہور ہائیکورٹ نے سپر ماڈل ایان علی کی ضمانت کا تفصیلی فیصلہ جاری کرتے ہوئے قرار دیا ہے کہ ایان علی کو کسٹمز کاﺅنٹر پر پہنچنے سے پہلے گرفتار کیا گیا،ایان علی کو نہ تو بورڈنگ پاس جاری ہو ااور نہ ہی اس کے سامان کو جہاز میں رکھنے کے لئے ٹیگ لگا ، ابھی تعین ہوناضروری ہے کہ کیا وہ امریکی ڈالرز بیرون ملک سمگل کرنا چاہتی تھی یا نہیں۔ گزشتہ روز لاہورہائیکورٹ کے جسٹس انوار الحق کی سربراہی میں قائم دو رکنی ڈویژن بنچ نے ماڈل ایان علی کی ضمانت کا تین صفحات پر مشتمل تحریری فیصلہ جاری کیا ۔ تحریری فیصلے میں قرار دیا گیا ہے کہ ایان علی کو ائیر پورٹ سکیورٹی فورس کے کاﺅنٹر سے گرفتار کیا گیا اوروہ ابھی کسٹمز کاﺅنٹر پر بھی نہیں پہنچی تھی جہاں اسے اپنے سامان سے متعلق ڈیکلریشن دینا تھا۔ ائیرپورٹ پر ایان علی کو نہ تو بورڈنگ پاس جاری ہو ااور نہ ہی اس کے سامان کو جہاز میں رکھنے کے لئے ٹیگ لگا تھا۔ کیونکہ ابھی سامان کی تفصیلات بتانے کا مرحلہ نہیں آیا تھا۔ عدالتی فیصلے میں قرار دیا گیا کہ درخواست گزار کا یہ بیان کہ پانچ لاکھ امریکی ڈالرز کی رقم اس نے کراچی بحریہ میں واقع پانچ پلاٹس فروخت کر کے حاصل کی تھی جو وہ اپنے بھائی کو دینے لئے ائیر پورٹ پر اس کا انتظار کر رہی تھی۔ اس پہلو کو بھی مدنظر رکھتے ہوئے ابھی اس بات کا تعین لیا جانا ضروری ہے کہ کیا وہ امریکی ڈالرز بیرون ملک سمگل کرنا چاہتی تھی یا نہیں ۔ ایان علی کی رہائی کے لیے خصوصی تعمیل کنندہ تحریری احکامات لے کر راولپنڈی روانہ ہو گیا۔