اسلام آباد(نیوزڈیسک) شاہ محمود قریشی کہتے ہیں جوڈیشل کمیشن کو دنوں کا پابند نہیں کیا جاسکتا، تحقیقات کیلئے جتنا وقت درکار ہوگا لے گا، تحقیقاتی کمیشن افتخار چوہدری سمیت کسی کو بھی طلب کر سکتا ہے۔چیف جسٹس کی سربراہی میں 3 رکنی جوڈیشل کمیشن کے ناموں کے اعلان کے بعدمیڈیاسے گفتگو کرتے ہوئے پی ٹی آئی وائس چیئرمین شاہ محمود قریشی نے کہا کہ ہماری کاوشیں رنگ لے آئیں، کمیشن آئندہ شفاف انتخابات کی بنیاد رکھے گا، تحقیقات کیلئے دنوں کی پابندی نہیں لگا سکتے، کمیشن کو جتنا وقت درکار ہوگا لے گا، تحقیقات کیلئے کسی بھی ادارے کی معاونت لی جاسکتی ہے۔ان کا مزید کہنا ہے کہ جوڈیشل کمیشن کی صوابدید ہے جتنے چاہے حلقے کھولے، ایک نہیں بیسیوں حلقے کھول سکتا ہے، تحقیقاتی کمیشن سابق چیف جسٹس افتخار چوہدری سمیت کسی کو بھی طلب کرسکتا ہے، اگر انتخابات شفاف قرار نہ پائے تو اسمبلیاں تحلیل ہوں گی۔صدر کی جانب سے آرڈیننس پر دستخط کے بعد سپریم کورٹ نے چیف جسٹس جسٹس کی سربراہی میں 3 رکنی جوڈیشل کمیشن تشکیل دیدیا، جس میں امیرہانی مسلم اور اعجاز افضل شامل ہیں۔