کراچی(نیوزڈیسک) سپر ہائی وے علی ٹاﺅن میں پولیس مقابلے کے دوران اہم طالبان کمانڈر ہلاک ہو گیا۔تفصیلات کے مطابق کراچی کے علاقے علی ٹاﺅن میں دہشت گردوں سے ساتھ پولیس مقابلے کے دوران طالبان کمانڈر ہلاک کر دیا ہے جبکہ اس کا ساتھی شدید زخمی حالت میں گرفتار بھی کیا گیا ہے ۔

ایس ایس پی ملیر راﺅ انوار نے میڈیا سے بات کرتے ہوئے کہا ہے کہ اس مقابلے کے دوران مزید 3 دہشت گردوں کو ہلاک کیا گیا ہے جبکہ ان میں سے ایک ہلاک دہشت گرد کی شناخت زبیر کے نام سے کی  گئی ہے ۔انہوں نے مزید بتایا کہ ہلاک دہشت گرد زبیر  تحریک طالبان پاکستان کے امیر ملا فضل اللہ کا قریبی ساتھی تھا۔پولیس کی جانب سے مزید بتایا گیا ہے کہ ہلاک دہشت گرد زبیر ڈرون حملے میں زخمی بھی ہوا تھا جس کے بعد وہ کراچی آ گیا اور یہاں دہشت گردی کی کاروائیاں کرنے لگا۔پولیس کا مزید کہنا تھا کہ ہلاک دہشت گردوں سے بارودی مواد ، دستی بم اور بھاری مقدار میں اسلحہ برآمد کیا گیا ہے ۔