لندن (نیوز ڈیسک) متحدہ قومی موومنٹ کے سربراہ الطاف حسین کی طرف سے رینجرز کے کرنل اور دیگر عملہ کو جنہوں نے نائن زیرو پر چھاپہ مارا تھا کو سنگین نتائج کی دھمکیاں دینے کے خلاف برطانیہ میں موجود تمام طبقہ ہائے فکر کے لوگوں کے علاوہ آل پاکستان لائرز ایسوسی ایشن برطانیہ کے بیرسٹر ز ‘ سولیسٹرز ‘اور ممبران کے علاوہ پی ٹی آئی ‘ مسلم لیگ ن کے عہدیداروں اور اراکین کی طرف سے سکاٹ لینڈ یارڈ کو بذریعہ ٹیلی فون و تحریری شکایات موصول ہونا شروع ہو گئی ہیں ۔ عوام کی بھاری تعداد نے سکاٹ لینڈ یارڈ میں الطاف حسین کے خلاف شکایات درج کرانے کا سلسلہ شروع کر دیا ہے۔پاک فوج پاکستان کی سرحدوں کی محافظ ہے اور وہ کسی سیاسی جماعت کی آلہ کار نہیں ،سرحدوں کی حفاظت کے علاوہ اندرون ملک حفاظت بھی پاک فوج کی ذمہ داری ہے اور اس نے اپنا فریضہ سر انجام دیا ہے مگر الطاف حسین نے تین تلوار پر ہونے والی تقریر کی طرح دوبارہ ایک ایسی تقریر کی ہے جس پر رینجرز کی طرف سے مقدمہ درج کرایا گیا ہے۔اس تقریر کے خلاف شکایات درج کرانے کا یہ سلسلہ اب عروج کو پہنچ گیا ہے مگر اب تک درج کرائی جانے والی شکایات کی تعداد کا سرکاری طور پر علم نہیں ہو سکا تاہم ذرائع کا کہنا ہے کہ اب تک 15ہزار سے زائد افراد نے شکایات درج کروائی ہیں۔