کراچی ( نیوز ڈیسک ) سندھ کے صوبائی وزیر اطلاعات اور پیپلز پارٹی کے رہنماءشرجیل انعام میمن نے میڈیا سے بات کرتے ہوئے کہا ہے کہ بلاول بھٹو زرداری اپنے نانا ذوالفقارعلی بھٹو کی برسی پر پاکستان آئیں گے انہیں اس بات کا علم نہیں ہے۔انہوں نے کہا کہ بلاول بھٹو جب چاہیں پاکستان آ سکتے ہیں اور وہ پاکستان ضرور آئیں گے۔ اپنی جماعت پیپلز پارٹی کے حوالے سے ان کا کہنا تھا کہ پیپلز پارٹی ہمیشہ مفاہمت کی سیاست کرتی ہے جبکہ مفاہمت کی سیاست کو ہی فروغ دیں گے۔سندھ میں جاری دہشت گردی کے خلاف آپریشن کے حوالے سے شرجیل میمن کا کہنا تھا کہ سندھ میں آپریشن کے کپتان وزیر اعلیٰ سندھ سید قائم علی شاہ ہیں جبکہ کراچی میں جگہ جگہ لگے سائن بورڈز بھی سیکورٹی رسک ہیں۔انہوں نے واضح کیا کہ سندھ پولیس اور رینجرز مل کر دہشت گردی کے خلاف آپریشن کر رہی ہیں جبکہ بہت جلد صوبہ سے دہشت گردی کو ختم کر دیا جائے گا۔