ننکانہ صاحب: قومی اسمبلی کے حلقہ این اے 137 پر ہونے والے ضمنی انتخاب میں مسلم لیگ(ن) کی امیدوارڈاکٹرشذرہ منصب علی کامیاب قرار پائی ہیں۔ غیر حتمی اور غیر سرکاری نتائج کے مطابق(ن) لیگ کی امیدوار نے 75 ہزار890 ووٹ حاصل کئے جب کہ آزاد امیدوار بریگیڈیئرریٹائرڈاعجازشاہ 36 ہزار 635 ووٹ لے کردوسرے نمبرپر رہے۔ وزیراعظم نوازشریف نے ڈاکٹرشذرہ منصب کو مبارک باد دیتے ہوئے امید ظاہر کی کہ وہ حلقے کے عوام کی فلاح و بہبود کے لئے کام کریں گی جب کہ مسلم لیگ ن کی امیدوارکی ضمنی انتخابات میں کامیابی عوام کی جانب سے حکومتی پالیسیوں پراعتمادکا اظہار ہے۔ این اے 137 پر ضمنی انتخاب کے لئے ووٹنگ کا عمل صبح 8 بجے شروع ہوا جو بغیر کسی وقفے کے شام 5 بجے تک جاری رہا۔ حلقے میں 2 لاکھ 87 ہزار 719 رجسٹرڈ ووٹرز کے لئے 256 پولنگ اسٹیشن قائم کئے گئے جن میں سے 48 پولنگ اسٹیشنز کو حساس قرار دیا گیا تھا کسی بھی ناخوشگوار صورتحال سے نمٹنے کے لئے 100 سے زائد پولیس اہلکار جب کہ رینجرز کے دستے بھی تعینات کئے گئے تھے،ووٹنگ کے دوران کسی بھی قسم کا ناخوشگوار واقعہ پیش نہیں آیا اور پولنگ کا عمل مقررہ وقت تک بلا تعطل جاری رہا۔ واضح رہے کہ این اے 137 کی نشست مسلم لیگ (ن) کے رائے منصب علی خان کے انتقال کرنے جانے کے باعث خالی ہوئی تھی اور ضمنی انتخاب میں کامیاب ہونے والی ڈاکٹر شذ رہ منصب علی خان مرحوم کی صاحبزادی ہیں جب کہ آزاد امیدوار بریگیڈیئر ریٹائرڈ اعجاز شاہ کو تحریک انصاف اور عوامی تحریک کی حمایت حاصل تھی۔