جنوبی افریقا (نیوز ڈیسک) کے خلاف شاہینوں نے میدان کیا مارا کہ اسٹیڈیم میں موجود پرجوش تماشائی اپنے جذبات پر قابو نہ رکھ سکے اور انہوں نے پاکستان زندہ باد کے ساتھ ساتھ گو نواز گو کے نعرے بھی لگانا شروع کردیئے جس سے کچھ دیر کے لیے اسٹیڈیم میں ماحول سیاسی ہوگیا۔پاکستان اور جنوبی افریقا کے درمیان میچ جب اپنے عروج پر پہنچا اور پاکستان کی فتح کی جانب پیش قدمی تیزی سے جاری تھی تو تماشائیوں کا جوش و خروش بڑھتا جا رہا تھا، سبز لباس زیب تن کیے مرد وخواتین اور بچے کبھی رقص کرتے تو کبھی اپنی پوری طاقت سے نعرے لگا کر نہ صرف پاکستانی ٹیم کا حوصلہ بلند کر رہے تھے بلکہ اپنے جذبات کے سمندر کو نعروں کے ذریعے باہر نکال رہے تھے لیکن اسی دوران ایک منچلے نے نعروں کی روانی کا بھرپور فائدہ اٹھاتے ہوئے ’’پاکستان زندہ باد ‘‘ کے بجائے سیاسی نعرہ ’’ گو نواز گو ‘‘بھی لگادیا جسے سن کر نہ صرف تماشائی حیران ہوئے بلکہ کچھ دیر کے لیے تو ماحول بھی سیاسی بن گیا جس کے بعد کچھ دیر کے لیے گو نواز گو کا نعرہ گونجنے لگا۔واضح رہے کہ اسلام آباد میں تحریک انصاف کے دھرنے کے دوران عمران خان نے وزیراعظم نوازشریف کی حکومت کے خلاف ’’گو نواز گو‘‘ کا نعرہ لگایا تھا جس کا سامنا حکومتی وزرا سمیت وزیراعظم کو بھی کئی جگہ کرنا پڑا تھا۔