اسلام آباد(این این آئی)پاکستان اپنے قیام کے سو سال مکمل ہونے پر کیسا ہوگا؟ منظر کشی کی تیاری شروع کر دی گئی ۔

ذرائع کے مطابق وفاقی حکومت نے وژن 2047پاکستان کے نام سے طویل المدتی منصوبے کے اجرا کا فیصلہ کرلیا ہے، منصوبے میں نوجوانوں کو پائیدار ترقی، جدت اور خوشحالی کا محرک بنانا ترجیح قرار دیدیا گیا۔طویل مدتی وژن میں آئندہ 21برس کیلئے قومی ترقی، معاشی تبدیلی اور انسانی سرمائے کی بہتری کے اہداف طے کیے جائیں گے۔ذرائع کے مطابق وزیراعظم کی جانب سے وژن دو 2047کا باضابطہ اعلان 12اگست کو نوجوانوں کے عالمی دن کے موقع پر متوقع ہے۔ متعلقہ وزارتوں، ڈویژنز، سے وژن دو ہزار سینتالیس کے مقاصد اور ترجیحات طلب کرلی ہیں ۔ تمام منسلک محکموں، خودمختار اداروں، دفاتر سے آرا مانگی گئی ہیں۔ حکمت عملی کے اہداف، اہم اصلاحات اور تفصیلات پیش کرنے کا بھی کہا گیا ہے ۔