واشنگٹن(این این آ ئی)امریکی صدر ڈونلڈ ٹرمپ نے ایران کی پیشکش مسترد کرتے ہوئے کہاہے کہ جوہری معاہدے تک ناکہ بندی برقرار رہے گی۔
غیرملکی میڈیاکے مطابق وائٹ ہاؤس حکام نے بتایا کہ امریکی صدر ٹرمپ کی تیل کمپنیوں کے اعلیٰ حکام سے ملاقات ہوئی۔ملاقات کے دوران ایران ناکہ بندی طویل ہونے کی صورت میں عالمی آئل مارکیٹ پر مشاورت ہوئی، ٹرمپ نے تیل قیمتوں میں استحکام کیلئے اقدامات پر تبادلہ خیال کیا۔ترجمان وائٹ ہاؤس نے کہا کہ ڈونلڈ ٹرمپ ایران کو کبھی بھی جوہری ہتھیار حاصل کرنے نہیں دیں گے۔انہوں نے کہا کہ محاصرہ اس وقت تک جاری رہے گا جب تک ایران معاہدے پر راضی نہیں ہوتا، ایران سے ایسا معاہدہ چاہتے ہیں جس میں ایٹمی پروگرام پر ہمارے خدشات دور ہوں۔امریکی صدر نے کہا کہ ایران کی بحری ناکہ بندی بمباری سے زیادہ موثر ہے، ایران اس کی وجہ سے تیل برآمد کرنے سے قاصر ہے اور ان کے حالات بد سے بدتر ہورہے ہیں۔ٹرمپ نے کہا کہ ہمارے محاصر کی وجہ سے ایران کا دم شدید گھٹ رہا ہے، ایران کی تیل ذخیرہ کرنے کی تنصیبات، پائپ لائنیں پھٹنے کے قریب ہیں۔انہوں نے کہا کہ ایران پر دوبارہ حملے شروع کرنے کا کوئی حکم جاری نہیں کیا ہے۔
