اسلام آباد(نیوز ڈ یسک)اسرائیل کے وزیرِاعظم بنیامین نیتن یاہو نے اپنے تازہ ویڈیو پیغام میں ایران سے متعلق اہم دعوے کیے ہیں۔

انہوں نے کہا کہ ایسی اطلاعات موصول ہو رہی ہیں جن سے ظاہر ہوتا ہے کہ ایرانی سپریم لیڈر آیت اللہ علی خامنہ ای شاید حیات نہیں رہے، تاہم اس بارے میں حتمی تصدیق ابھی تک سامنے نہیں آئی۔نیتن یاہو کا کہنا تھا کہ ایرانی پاسدارانِ انقلاب کے کئی کمانڈرز بھی مارے جا چکے ہیں، جبکہ خامنہ ای کے کمپاؤنڈ کو تباہ کر دیا گیا ہے اور متعدد سینئر جوہری حکام بھی ہلاک ہوئے ہیں۔ انہوں نے مزید کہا کہ آئندہ دنوں میں ایران میں مزید ہزاروں اہداف کو نشانہ بنایا جائے گا اور کارروائیاں اس وقت تک جاری رہیں گی جب تک اسرائیل کو ضروری محسوس ہوگا۔اسرائیلی میڈیا رپورٹس کے مطابق خامنہ ای کے کمپاؤنڈ پر تقریباً 30 بم گرائے گئے اور ایران میں 500 سے زائد مقامات کو 200 اسرائیلی طیاروں نے نشانہ بنایا۔ دوسری طرف ایرانی حکام کا کہنا ہے کہ آیت اللہ علی خامنہ ای محفوظ اور خیریت سے ہیں۔

یاد رہے کہ گزشتہ روز امریکا اور اسرائیل نے ایران پر فضائی اور بحری حملے کیے تھے، جن کے نتیجے میں ایرانی میڈیا کے مطابق 201 افراد جاں بحق اور 747 زخمی ہوئے۔ بعض رپورٹس میں یہ دعویٰ بھی کیا گیا ہے کہ ان حملوں میں ایرانی وزیر دفاع امیر ناصر زادہ اور پاسدارانِ انقلاب کے سربراہ محمد پاکپور شہید ہو گئے۔ایرانی صدارتی محل اور سپریم لیڈر کے کمپاؤنڈ کے قریب بھی کئی میزائل گرنے کی اطلاعات ہیں، تاہم ایران نے صدر مسعود پزشکیان اور آیت اللہ علی خامنہ ای کے محفوظ ہونے کا اعلان کیا ہے۔