اسلام آباد سے موصولہ اطلاعات کے مطابق وزیراعلیٰ خیبر پختونخوا سہیل آفریدی نے سابق وزیر اعظم عمران خان کی رہائی کے لیے ایک نئی تنظیم قائم کرنے کا اعلان کیا ہے۔

سپریم کورٹ کے باہر صحافیوں سے گفتگو کرتے ہوئے انہوں نے کہا کہ انہیں بانی چیئرمین پاکستان تحریک انصاف کی جانب سے احتجاجی تحریک منظم کرنے کی ذمہ داری دی گئی ہے۔ ان کا دعویٰ تھا کہ عدالتی احکامات پر عمل نہیں ہو رہا اور ذاتی ڈاکٹروں تک رسائی بھی فراہم نہیں کی جا رہی۔انہوں نے بتایا کہ وہ “بانی رہائی فورس” کے نام سے ایک تنظیم تشکیل دے رہے ہیں جسے باقاعدہ رجسٹر کیا جائے گا۔ ان کے مطابق یہ فورس پُرامن انداز میں جدوجہد کرے گی اور عید کے بعد 22 فروری کو پشاور میں اس کے ارکان سے حلف لیا جائے گا۔ انہوں نے کہا کہ تنظیم کا باقاعدہ نظم و نسق ہوگا اور قیادت اس شخصیت کے پاس ہوگی جسے عمران خان نامزد کریں گے۔

سہیل آفریدی نے مزید کہا کہ کسی بھی تحریک سے پہلے مکمل تیاری ضروری ہے اور ان کی جدوجہد جمہوریت، آئین کی بالادستی اور آزاد میڈیا کے لیے ہوگی۔ ایک سوال کے جواب میں انہوں نے پارٹی کے اندر اختلافات سے متعلق کہا کہ جو لوگ انہیں عہدے سے ہٹانا چاہتے ہیں وہ یاد رکھیں عزت اور ذلت اللہ کے ہاتھ میں ہے، جبکہ اس حوالے سے پیغامات کے بارے میں متعلقہ افراد سے پوچھا جا سکتا ہے۔