اسلام آباد (نیوز ڈیسک) سابق وزیرِ اعلیٰ خیبر پختونخوا علی امین گنڈاپور کے بیانات، جو عمران خان کی اہلیہ بشریٰ بی بی اور بہن علیمہ خان سے متعلق تھے، پر پی ٹی آئی نے سخت ایکشن لینے کا فیصلہ کر لیا ہے۔
نجی خبررساں ادارے جنگ کے مطابق پارٹی کی مرکزی قیادت نے علی امین گنڈاپور کے ان بیانات کا تفصیلی جائزہ لیا اور اڈیالہ ملاقاتوں کے بعد انہیں معطل یا کارروائی کے دائرے میں لانے کا فیصلہ کیا۔ ذرائع کے مطابق، پارٹی نے تمام ویڈیوز اور انٹرویوز کو بغور دیکھنے کے بعد یہ قدم اٹھانے کا فیصلہ کیا ہے۔چیئرمین پی ٹی آئی بیرسٹر گوہر نے اس معاملے پر کہا کہ بانی پی ٹی آئی کے اہلخانہ کے بارے میں کوئی بھی ناپسندیدہ یا توہین آمیز بیان برداشت نہیں کیا جائے گا۔
تحریک انصاف کے رہنما سلمان اکرم راجہ نے بھی کہا کہ علی امین گنڈاپور نے متعدد بیانات دئیے ہیں اور پارٹی ان کا مناسب جواب دے گی۔ انہوں نے واضح کیا کہ کسی معاملے کو نظرانداز نہیں کیا جائے گا اور وقت کے مطابق ہر بیان کا جواب دیا جائے گا۔
