اسلا م آباد (نیوز ڈیسک)فن لینڈ نے اعلان کیا ہے کہ وہ عملی اور سفارتی حکمتِ عملی کے تقاضوں کے تحت پاکستان میں اپنا سفارت خانہ بند کر رہا ہے۔ فن لینڈ کی وزارتِ خارجہ کے مطابق یہ فیصلہ صرف پاکستان تک محدود نہیں، بلکہ افغانستان اور میانمار کے سفارت خانے بھی بند کیے جائیں گے۔جاری کردہ بیان کے مطابق اسلام آباد، کابل اور ینگون میں فن لینڈ کے سفارتی مشن 2026 میں مکمل طور پر بند کر دیے جائیں گے۔

وزارتِ خارجہ نے وضاحت کی کہ پاکستان سمیت ان ممالک کے ساتھ تجارتی اور معاشی سرگرمیاں محدود ہونے کے باعث یہ اقدام اٹھایا جا رہا ہے، جبکہ مقامی سیاسی حالات میں تبدیلیاں بھی اس فیصلے کا ایک سبب ہیں۔حکام کا کہنا ہے کہ فن لینڈ نے اس سے قبل 2012 میں بھی بجٹ میں کمی کے باعث پاکستان میں اپنی سفارتی سرگرمیاں معطل کر دی تھیں، تاہم بعد ازاں 2022 میں اسلام آباد میں سفارت خانہ دوبارہ فعال کیا گیا تھا۔