اسلام آباد (نیوز ڈیسک) سینیٹ میں فوجداری قوانین میں ترمیم سے متعلق ایک نیا بل پیش کر دیا گیا ہے۔
میڈیا رپورٹس کے مطابق، اس ترمیمی بل میں خاتون کو عوامی مقام پر برہنہ کرنے یا ہائی جیکر کو پناہ دینے جیسے جرائم پر سزائے موت ختم کرنے کی تجویز شامل ہے۔
بل کے مطابق، اگر کسی خاتون پر مجرمانہ حملہ کیا جائے یا اسے سرعام بے لباس کیا جائے تو مجرم کو عمر قید کی سزا دی جائے گی، ساتھ ہی اس کی جائیداد ضبط اور جرمانہ بھی عائد کیا جائے گا۔ سزائے موت کو اس جرم سے ہٹا دیا جائے گا۔
ترمیمی مسودے کے تحت ایسے جرم میں ملوث ملزم کو بغیر وارنٹ گرفتار کیا جا سکے گا اور یہ جرم ناقابل ضمانت تصور ہوگا۔
اس کے علاوہ، اس قانون میں مجوزہ تبدیلی کے مطابق، ایسے واقعات ناقابل مصالحت قرار دیے جائیں گے، یعنی متاثرہ فریق اور ملزم کے درمیان کوئی صلح یا سمجھوتہ نہیں ہوسکے گا۔
