اسلام آباد (نیوز ڈیسک) فیلڈ مارشل جنرل سید عاصم منیر، جو ان دنوں سرکاری دورے پر امریکہ میں موجود ہیں، کی امریکی صدر ڈونلڈ ٹرمپ سے ملاقات آج وائٹ ہاؤس میں طے پا گئی ہے۔ ذرائع کے مطابق صدر ٹرمپ کی جانب سے فیلڈ مارشل عاصم منیر کے اعزاز میں ظہرانے کا اہتمام کیا جا رہا ہے، جو دوپہر ایک بجے کیبنٹ روم میں منعقد ہوگا۔
اس اہم ملاقات کے دوران دونوں رہنما باہمی تعلقات، خطے میں سیکیورٹی کی صورتحال، اور ایران-اسرائیل کشیدگی جیسے اہم امور پر تبادلہ خیال کریں گے۔ ملاقات کو خفیہ رکھا گیا ہے اور میڈیا کو رسائی کی اجازت نہیں دی گئی، تاہم ظہرانے کے بعد دونوں رہنما ممکنہ طور پر صحافیوں سے گفتگو کریں گے۔ اطلاعات کے مطابق امریکی نائب صدر جے ڈی وینس اور وزیر دفاع ہینکر سمیت کئی اعلیٰ حکام کی اس تقریب میں شرکت متوقع ہے۔
فیلڈ مارشل عاصم منیر کی امریکی وزیر خارجہ اور وزیر دفاع کے ساتھ علیحدہ ملاقاتیں بھی طے ہیں، جو دونوں ممالک کے باہمی تعلقات اور خطے میں جاری کشیدگی کے تناظر میں غیر معمولی اہمیت کی حامل قرار دی جا رہی ہیں۔
آئی ایس پی آر کے مطابق، واشنگٹن ڈی سی میں مقیم پاکستانی کمیونٹی نے بھی آرمی چیف کا بھرپور استقبال کیا۔ اوورسیز پاکستانیوں سے ملاقات کے دوران جنرل عاصم منیر نے ان کے وطن کے لیے جذبے اور خدمات کو سراہا، اور ترسیلات زر، سرمایہ کاری و دیگر شعبوں میں ان کی کاوشوں کا اعتراف کیا۔
آرمی چیف نے گفتگو میں سمندر پار پاکستانیوں کے پاکستان کے سفیر کے طور پر ادا کیے گئے کردار کو سراہتے ہوئے ان کے تجربات اور تجاویز کو سننے میں گہری دلچسپی ظاہر کی۔ اجلاس کا اختتام ایک مضبوط، خوشحال اور محفوظ پاکستان کے لیے مشترکہ عزم کی تجدید کے ساتھ ہوا۔
