تہران (مانیٹرنگ ڈیسک) ایران کی مسلح افواج کے سربراہ میجر جنرل سید عبدالرحیم موسوی نے اسرائیل کے خلاف جلد ایک بڑی جوابی کارروائی کا عندیہ دے دیا ہے۔

اپنے ویڈیو بیان میں جنرل موسوی نے کہا کہ ایران کی جانب سے کی گئی اب تک کی کارروائیاں محض انتباہی نوعیت کی تھیں، لیکن اصل ردعمل ابھی آنا باقی ہے۔

انہوں نے اسرائیلی شہریوں کو خبردار کرتے ہوئے کہا کہ وہ فوری طور پر تل ابیب اور حیفا جیسے اہم شہروں سے نکل جائیں کیونکہ آئندہ حملے شدید تر ہوں گے۔

ایرانی افواج کے سربراہ نے واضح کیا کہ شہداء کے خون کا حساب لیا جائے گا اور یہ قوم، دشمن کی کسی جارحیت کے سامنے سر نہیں جھکائے گی۔ ان کا کہنا تھا کہ ایران اسرائیل کو اس کے مظالم کی مکمل سزا دے کر رہے گا۔

خیال رہے کہ ایران نے حالیہ دنوں میں اسرائیل پر کئی میزائل اور ڈرون حملے کیے ہیں۔ ان حملوں میں تل ابیب اور حیفا کو نشانہ بنایا گیا، جس کے نتیجے میں حیفا کی آئل ریفائنری کی سرگرمیاں معطل ہو گئی ہیں۔

ایرانی میڈیا کے مطابق جمعہ کے بعد سے اب تک ان جوابی حملوں میں 24 اسرائیلی ہلاک ہو چکے ہیں، جب کہ ایران نے آج اسرائیل کے دارالحکومت میں واقع موساد کے ہیڈ کوارٹر پر بھی حملہ کیا ہے۔