راولپنڈی (نیوز ڈیسک)اڈیالہ جیل کے قریب پولیس نے پاکستان تحریک انصاف کے اہم رہنماؤں اور عمران خان کی تین بہنوں کو حراست میں لے لیا، جو عمران خان سے ملاقات کی غرض سے جیل جا رہے تھے۔
تفصیلات کے مطابق پی ٹی آئی کے رہنما عمر ایوب، صاحبزادہ حامد رضا، احمد خان بچھر، اور عمران خان کی بہنیں علیمہ خان، نورین خانم اور عظمیٰ خانم جیسے ہی جیل کے قریب پہنچے، پولیس نے انہیں ناکے پر روک لیا۔ اس موقع پر پولیس اور پی ٹی آئی رہنماؤں کے درمیان تلخ کلامی بھی ہوئی۔
ذرائع کے مطابق پولیس اہلکاروں نے انہیں متعدد افراد کے وارنٹ گرفتاری دکھائے، جن میں پی ٹی آئی قیادت کے ساتھ ساتھ عمران خان کے رشتہ دار قاسم خان کے بھی وارنٹ شامل تھے۔ پولیس کے مطابق گرفتار کیے جانے والوں میں صاحبزادہ حامد رضا، احمد خان بچھر اور دیگر شامل ہیں، جنہیں قیدیوں کی وین میں بٹھا کر تھانے منتقل کر دیا گیا۔
ذرائع کا کہنا ہے کہ جمعرات کا دن عمران خان سے اہل خانہ کی ملاقات کے لیے مقرر نہیں تھا، اس کے باوجود ان کی بہنیں ملاقات کے لیے جیل پہنچیں، جس پر پولیس نے قانونی کارروائی کرتے ہوئے انہیں حراست میں لیا۔
پولیس کے مطابق، جیل جانے پر اصرار اور واپسی سے انکار پر حراست عمل میں لائی گئی، جبکہ وارنٹس کے مطابق یہ اقدام قانونی دائرہ کار میں کیا گیا ہے۔
