لاہور( این این آئی) پاکستان تحریک انصاف کی سینئر رہنما مسرت جمشید چیمہ نے کہا ہے کہ جیل ٹرائل کے دوران دوسری بار بانی پی ٹی آئی عمران خان سے ملاقات ہوئی، 500 دن گزرنے کے بعد بھی عمران خان کا عزم و ولولہ پہلے کی طرح قائم ہے،ان کا ہر فیصلہ پاکستان کی بہتری اور ایک مثبت سوچ کے ساتھ جڑا ہوا ہے۔
ایکس پر جاری اپنے بیان میں مسرت جمشید چیمہ نے کہا کہ مذاکرات کا فیصلہ بھی اسی لیے کیا گیا کہ اہل اقتدار کو موقع دیا جائے کہ وہ پاکستان کو ایک بحران سے دوسرے بحران میں لے جانے کی بجائے آگے چلنے کا سوچیں، موجودہ حکمران جعلی مینڈیٹ کے ساتھ سرکاری عمارتوں پر قابض تو رہ سکتے ہیں لیکن عوام کا اعتماد حاصل نہیں کر سکتے،اس وقت پاکستان کے آگے بڑھنے کا واحد راستہ سیاسی ڈائیلاگ اور نئے انتخابات کی تاریخ کا اعلان ہے ،اسی طرح پاکستان میں حالات معمول پر آ سکتے ہیں۔ انہوںنے کہاکہ ملاقات میں عمران خان نے مشکل ترین حالات میں ہونے کے باوجود اپنے کارکنان کو حوصلہ دیا،ان شااللہ عمران خان جلد اپنے اگلے لائحہ عمل کا اعلان کریں گے۔
