اسلام آباد (این این آئی) بانی پی ٹی آئی عمران خان نے 13دسمبر کو پشاور میں جلسے کا اعلان کردیا ۔ذرائع کے مطابق بانی پی ٹی آئی عمران خان نے اسلام آباد میں پارٹی کے حالیہ جلسے کے دوران مارے گئے شہداء کو خراج عقیدت پیش کرنے کیلئے 13 دسمبر کو پشاور میں عظیم الشان اجتماع کا اعلان کیا ہے۔

ایکس اکانٹ پر شیئر کیے گئے اپنے تازہ ترین پیغام میں عمران خان نے کہا ملک میں آمریت قائم ہو چکی ہے،ہمارے سینکڑوں کارکن لاپتا ہیں، سپریم کورٹ کو اب اس کا نوٹس لینا چاہیے اور اپنا آئینی کردار ادا کرنا چاہیے۔انہوں نے کہا کہ ہم نے انسانی حقوق کی سنگین خلاف ورزیوں پر سپریم کورٹ، لاہور ہائی کورٹ اور اسلام آباد ہائی کورٹ سے رجوع کیا لیکن عدالتوں کی جانب سے کوئی کارروائی نہیں کی گئی ۔بانی پی ٹی آئی نے حکومت سے مذاکرات کیلئے عمر ایوب خان، علی امین گنڈا پور، صاحبزادہ حامد رضا، سلمان اکرم راجہ اور اسد قیصر پر مشتمل پانچ رکنی مذاکراتی ٹیم بھی تشکیل دی گئی ہے۔