اسلام آباد (این این آئی) فیڈرل گورنمنٹ ایجوکیشنل انسٹی ٹیوشنزکینٹ گیریڑن ڈائریکٹوریٹ کے زیر انتظام ملک بھر کے تعلیمی اداروں میں تعینات ای ایس ٹی اساتذہ نے وزیراعظم عمران خان سے گریڈ 16 میں اپ گریڈ کرنے کا مطالبہ کیا ۔تفصیلات کے مطابق ملک بھر کے ایف جی ای آئی ڈائریکٹوریٹ کے زیرانتظام 355 تعلیمی اداروں کے ایلمنٹری سکول ٹیچرز نے اپ گریڈ کرنے کا مطالبہ کیا ہے
جس کے مطابق ایلیمنٹری اسکول ٹیچر کو گریڈ 14 سے اپ گریڈ کرکے گریڈ16 دینے اور سالوں سے پرموٹ نہ کئے جانے والے اساتذہ کی پروموشن کرنے کا مطالبہ کیاگیاہے۔اساتذہ کے مطابق گریڈ 16 میں اپ گریڈیشن کے ساتھ ساتھ ای ایس ٹی اساتذہ کرام کو تین اضافی سالانہ انکریمنٹس دیئے جائیں اور یہی سہولت تمام ٹی جی ٹی اور ایس ایس ٹی اساتذہ کو بھی دی جائے، اسی طرح اعزازی اساتذہ(آنریری ٹیچرز)کے اعزازیہ میں بھی اضافہ کا مطالبہ کیاگیا ہے-اساتذہ کا کہنا ہے کہ فیڈرل گورنمنٹ ایجوکیشنل انسٹی ٹیوشنزکینٹ گیریڑن ڈائریکٹوریٹ نے ای ایس ٹی اساتذہ کی ترقی اور انڈکشن کے حوالے سے جو فارمولا بنایا ہے وہ 25 فیصد اساتذہ کی ترقی اور 75 فیصد نئے اساتذہ کی بھرتی ہے جو کہ سراسر ظلم زیادتی اور ناانصافی پرمبنی ہے جس کی وجہ سے سینکڑوں اساتذہ کرام سالوں سے ترقی کے منتظر ہیں جبکہ نئے اساتذہ کی بھرتی کاسلسلہ جاری ہے- اساتذہ کے مطابق ایف جی ای آئی ڈائریکٹوریٹ نے سال 2008 سے ای ایس ٹی اساتذہ کی پروموشن نہیں کی ہے جبکہ اس دوران سال 2022ئ تک سینکڑوں نئے اساتذہ کی تعیناتی کی گئی ہے اس طرح ہزاروں اساتذہ اپنے بنیادی حق سے محروم ہیں- اساتذہ فرحت عباس، ملک گلزارحسین، عارف عباسی، اسامہ ممتازقریشی اور دیگر کا کہنا ہے کہ ملک میں مہنگائی اس قدر بڑھ چکی ہے کہ ان کا موجودہ تنخواہوں میں گزارا نہیں ہے- اس لئے حکومت انہیں ان کے بنیادی حق پروموشن اور اپ گریڈیشن سے مستفید کرے-انہوں نے کہاکہ ای ایس ٹی اساتذہ کو چاردرجاتی فارمولے میں بھی نظر انداز کیاگیا جو سراسرزیادتی اور ظلم ہے-انہوں نے کہا کہ پورے ملک میں سب سے کم تنخواہوں پر اساتذہ کام کررہے ہیں-ان کا کہاتھا کہ کسی بھی حکومت کی ترجیحات میں اساتذہ اور قوم کے معماروں کی ترقی اور ان کو سہولیات دینے کا خیال نہیں رکھا گیا-ان کا کہنا تھا کہ اساتذہ جن کی تنخواہ تمام شعبوں سے زیادہ ہونی چاہیے ان کو ہمیشہ یکسر نظر انداز کیاگیا-انتہائی قلیل تنخواہوں میں اساتذہ گزارہ کرنے پر مجبور ہیں اور سفید پوشی سے زندگیاں بسر کررہے ہیں-اساتذہ نے وزیراعظم پاکستان عمران خان سے اپیل کی ہے کہ اساتذہ کی تنخواہوں کے لئے خصوصی پیکیج دیاجائے اور بالخصوص ای ایس ٹی اساتذہ کواپ گریڈیشن اور ڈیپارٹمنٹل ترقی دے کر ان سے کی گئی زیادتیوں کاازالہ کیاجائے-
