اسلام آباد (این این آئی) پاکستان پیپلز پارٹی کی نائب صدر سینیٹر شیری رحمن نے کہا ہے کہ عالمی منڈی میں خام تیل کی قیمتوں میں اضافے کا بہانا بنا کر حکومت یکم مارچ سے ایک بار پھر پیٹرول کی قیمتوں میں بڑا اضافہ کرنے جا رہی ہے۔ اپنے بیان میں شیری رحمن نے کہاکہ اس وقت عالمی منڈی میں خام تیل کی قیمت 100 ڈالر فی بیرل ہے، ملک میں پیٹرول کی قیمت 160 روپے فی لیٹر ہے۔

شیری رحمن نے کہاکہ قیمتوں میں مزید اضافہ ناقابل قبول ہوگا۔ انہوںنے کہاکہ پیپلز پارٹی کے دور میں عالمی منڈی میں تیل کی قیمت 110ڈالر فی بیرل جبکہ ملک میں پیٹرول کی قیمت 113 روپے تھی۔ سینیٹر شیری رحمن نے کہاکہ لہذاحکومت عالمی منڈی کی آڑ میں عوام کو لوٹنے کا منصوبہ نا بنائے، اپنی نااہلی اور عالمی قیمتوں کا بوجھ عوام پر منتقل نا کریں۔ انہوںنے کہاکہ عوام پہلے ہی تاریخی مہنگائی سے پریشان ہیں۔