اسلام آباد (این این آئی)آئی ایم ایف سے مذاکرات کی تیاریاں آخری مراحل میں داخل ہوگئیں، گیس ریٹ بڑھا کراہم ترین ہدف بھی حاصل کرلیا گیا ۔تفصیلات کے مطابق آئی ایم ایف کے ساتھ پہلے جائزہ مذاکرات کی راہ ہموار ہوگئی ہے ،پاکستان نے آئی ایم کی تمام شرائط پوری کرتے ہوئے گیس ریٹ بڑھا کراہم ترین ہدف بھی حاصل کرلیا ہے، جائزے کی کامیابی پر پاکستان کو تقریبا 70 کروڑ ڈالرز کی قسط ملے گی۔

پاکستان نے جولائی سے ستمبر کیلئے آئی ایم ایف کی ٹیکس وصولی کی شرط بھی پوری کردی ہے، اور ایف بی آر نے 1978 ارب ہدف کے مقابلے 2041ارب روپے ٹیکس جمع کیا ہے۔ایف بی آر نے جولائی تا ستمبر کوئی ٹیکس ایمنسٹی سکیم جاری نہیں کی اور جولائی تا ستمبر لیوی کی مد میں 222ارب روپے حاصل کئے، جبکہ بجلی کے بنیادی ٹیرف میں بھی 7روپے 50پیسے فی یونٹ تک اضافہ کیا جا چکا ہے۔

یکم نومبر سے گیس ٹیرف میں تقریبا 200فیصد تک اضافہ کیا گیا ہے، جبکہ پاور سیکٹر کے سرکلر ڈیٹ میں اضافہ بھی آئی ایم ایف کے ہدف سے کم ہوا ہے، مالی سال کی پہلی سہ ماہی میں کوئی ضمنی گرانٹ جاری نہیں کی گئی اور پیٹرول پر پیٹرولیم لیوی فی لیٹر60روپے کی بالائی حد تک بڑھائی گئی ہے۔