لاہور ( این این آئی) استحکام پاکستان پارٹی میں اہم سیاسی شخصیات کی شمولیت کا سلسلہ جاری،تحریک انصاف کی سابق ممبران قومی و صوبائی اسمبلی عندلیب عباس،سعدیہ سہیل رانا اور سمیرا احمد نے تحریک انصاف سے علیحدگی کا اعلان کرتے ہوئے آئی پی پی میں شمولیت اختیار کرلی۔تینوں نے چیئرمین سیکرٹریٹ لاہور میں مرکزی سیکرٹری اطلاعات ڈاکٹر فردوس عاشق اعوان، ایڈیشنل سیکرٹری جنرل عون چوہدری ،سینئر رہنما مراد راس اور منزہ حسن کے ہمراہ پریس انفرنس میں استحکام پاکستان پارٹی میں شمولیت کا باقاعدہ اعلان کیا ۔
اس موقع پر عندلیب عباس کا کہنا تھا کہ مقصد ایک فرد اور پارٹی سے بڑا ہوتا ہے آج عام پاکستانی بنیادی سہولیات سے محروم ہو چکے ہیں ،معاشی اور معاشرتی حالات انتہائی خراب ہیں ،ہم نے ہمیشہ لوگوں کی زندگیوں میں بہتری لانے کے لئے سیاست کی ہے اب یہ مشن استحکام پاکستان پارٹی کے پلیٹ فارم سے آگے بڑھائیں گے ہم لوگ مل کر مستحکم پاکستان بنائیں گے ۔ سعدیہ سہیل رانا نے اظہار خیال کرتے ہوئے کہا کہ ملک کے مفاد کے لئے استحکام پاکستان پارٹی میں شمولیت اختیار کی ہے ،ہمارا مقصد پہلے بھی لوگوں کی خدمت کرنا ہے آج بھی وہی ہے ۔ سمیرا احمد کا کہنا تھا کہ ہماری ذمہ داری ہے کہ ملک میں مثبت سوچ پیدا کریں ہم آج پھر ساتھ ہیں ملک کے لئے اکٹھے ہوئے ہیں، سیاسی میدان میں پہلے بھی لوگوں کی خدمت کے لئے آئے ،آئندہ بھی اسی ایجنڈے کے تحت کام کریں گے۔
اس موقع پر استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے تینوں رہنمائوں کو پارٹی میں خوش آمدید کہتے ہوئے کہا کہ سیاسی خواتین رہنمائوں کی شمولیت آئی پی پی کی جدت پسند سوچ کی عکاسی کرتی ہے ۔خواتین رہنمائوں کی شمولیت سے آئی پی پی کے سیاسی کنبے میں اضافہ ہوا ہے ،ان کی صلاحیتوں سے ملکی مسائل کے تدارک کے لئے بہت مدد ملے گی۔
