اسلام آباد: سابق وزیراعظم اور پارٹی چیئرمین عمران خان سے ملاقات کیلئے پاکستان تحریک انصاف نے 26 افراد کی فہرست تیار کرلی، ملاقاتیوں کی فہرست میں گھر کے افراد اور پارٹی رہنماؤں کے علاوہ عمران خان کے ڈاکٹر اور وکلا بھی شامل ہیں، فہرست درخواست کے ساتھ سپرنٹنڈنٹ اٹک جیل کو دی جائے گی۔ جیو نیوز نے ذرائع کا حوالہ دیتے ہوئے رپورٹ کیا ہے کہ عمران خان کی اہلیہ بشریٰ بی بی اور بہنیں عظمیٰ خان و علیمہ خان کے نام لسٹ میں شامل ہیں، پارٹی رہنماؤں کی طرف سے وائس چیئرمین پی ٹی آئی شاہ محمود قریشی، اسد قیصر، شبلی فراز، علی امین گنڈاپور، علی محمد خان، عمر ایوب اور رؤف حسن کے نام شامل ہیں۔

ذرائع سے معلوم ہوا ہے کہ سابق وزیراعظم کی صحت سے متعلق جاننے کے لیے ڈاکٹر فیصل سلطان کا نام دیا گیا ہے اور وکلاء میں نعیم حیدر پنجوتھہ، علی اعجاز بُٹر، گوہر علی خان، خواجہ حارث، سلمان صفدر اور شیر افضل مروت کے نام دیئے گئے ہیں۔