کوہاٹ(این این آئی) کوہاٹ سمیت خیبرپختونخوا کے بیشتر جنوبی و قبائلی اضلاع کے علاوہ ملک کے کئی دیگر علاقوں میں زلزلے کے شدید جھٹکے محسوس کئے گئے
تاہم فوری طورپر کسی جانی و مای نقصان کی اطلاع نہیں ملی۔بدھ کی را ت گئے تقریباً ایک بج کر 55 منٹ پرآنے والے طاقتور زلزلے نے خیبرپختونخوا سمیت ملک کے متعدد گنجان آباد علاقوں کو لرزا کر رکھ دیا۔برطانوی خبررساں ادارے کی رپورٹ میں امریکی جیولوجیکل سروے (یو ایس جی سی) کے حوالے سے بتایا گیا کہ ریکٹر اسکیل پر زلزلے کی شدت 6.1 ریکارڈ کی گئی اورزلزلے کا مرکز جنوب مشرقی افغانستان میں خوست شہر سے 44 کلومیٹر دور تھا جبکہ اس کی گہرائی 51 کلومیٹر تھی۔ زلزلے کے جھٹکے کوہاٹ‘ پشاور‘ بنوں ‘ کرک‘ ہنگو‘لکی مروت‘ ڈیرہ اسماعیل خان‘ مردان‘ نوشہرہ‘ مالاکنڈ‘ سوات اوردیر کے علاوہ قبائلی اضلاع اورکزئی‘ کرم‘ خیبر‘ مہمند‘ باجوڑ‘شمالی وزیرستا ن اور جنوبی وزیرستان میں بھی انتہائی شدت کے ساتھ محسوس کئے گئے جہاں خوابیدہ لوگوں کی بڑی تعداد بیدار ہوکر خوف اور ڈر کی وجہ سے سہمے ہوئے گھروں سے باہر نکلے اور کلمہ طیبہ کا ورد کرتے ہوئے استغفار کرتے رہے۔ زلزلے کے جھٹکے پنجاب کے کئی شہروں میں بھی محسوس کئے گئے۔
