لاہور( این این آئی)وزیراعظم شہبازشریف نے گردے اور جگر کے امراض کیلئے مخصوص ہسپتال پاکستان کڈنی اینڈ لیور انسٹی ٹیوٹ کا بورڈ بحال کرنے کا باضابطہ حکم جاری کر دیا ۔ ڈاکٹر سعید اخترکو امریکہ سے واپس بلا کر ایک بار پھر پی کے ایل آئی کا چیئرمین مقرر کردیا گیا ۔

وزیراعظم شہبازشریف نے اتوار کے روز پی کے ایل آئی کے بورڈ آف گورنرز کے اجلاس کی صدارت کی تھی ۔چار سال قبل ڈاکٹر سعید اختر عدالتی کارروائی اور دیگر مسائل کے بعد امریکہ واپس لوٹ گئے تھے ۔ڈاکٹر سعید اختر شہبازشریف کے جذبہ دلانے پر امریکہ سے سب کچھ چھوڑ کر پاکستان آئے ۔ وزیراعظم شہبازشریف نے ڈاکٹر سعید اختر کو واپس لانے میں ذاتی طور پر کردار ادا کیا ۔پی کے ایل آئی گردے اور جگر کی پیوند کار ی کا جدید ترین اور عالمی معیار کا حامل اولین ادارہ ہے ۔وزیراعظم شہبازشریف نے بطور وزیراعلی یہ منصوبہ جگر اور گردے کے مریضوں کو بیرون ملک علاج کے مہنگے اخراجات اور سفری دقتوں سے بچانے کے لئے بنایا تھا ۔ گزشتہ دور حکومت میں اس ہسپتال کو عملی طور پر غیر فعال کر دیا گیا تھا۔