لاہور(مانیٹرنگ +این این آئی) پاکستان مسلم لیگ (ن) کے قائد میاں نواز شریف نے حلقہ این اے 249 میں شکست پر ردعمل میں اپنے ٹوئٹر پیغام میں کہا کہ کراچی کے عوام کی محبت پر اللہ تعالیٰ کا شکر گزار ہوں، مفتاح اسماعیل کو حقیقی کامیابی پر مبارکباد، ووٹ کو عزت دو کے بیانیے کے

ساتھ کھڑا رہنے پر عوام کو خراج تحسین،انہوں نے اپنے ٹوئٹ میں مزید کہاکہ 190 پولنگ اسٹیشنز تک پاکستان مسلم لیگ ن جیت رہی تھی کہ اچانک ڈسکہ کی طرح بقیہ نتائج کو کئی گھنٹے تک روک دیا گیا، انہوں نے اپنےٹویٹ میں کہا کہ اختتام پر ن لیگ کو 683 ووٹوں سے ہروا دیا گیا جو کہ مسترد شدہ ووٹوں سے بھی کم ہیں، ہم نے ماضی میں بھی کراچی کی روشنیاں اور امن بحال کیا تھا اور آئندہ بھی کریں گے، انشاء اللہ۔ دوسری جانب پاکستان مسلم لیگ (ن)کی نائب صدر مریم نواز نے کہا ہے کہ مسلم لیگ (ن)ہار تب تسلیم کرے گی جب اس کو ہرایا تو جائے،شیر کا شکار کرنا آسان نہیں رہا،شیر کو ہرانے کے لیے جو ہتھکنڈے آپ نے آزمائے ان کی داستان بھی سامنے آنے والی ہے انتظار فرمائیے اور یاد رکھیے۔