اسلام آباد( آن لائن )وزیراعظم عمران خان نے کہا ہے کہ پاکستان سی پیک منصوبوں کو پایہ تکمیل تک پہنچانے کیلئے پرعزم ہے،غربت کے خاتمے کے ساتھ ساتھ ترقی کیلئے چین کے تجربے سے سیکھنے کی ضرورت ہے۔انہوں نے یہ بات چین کے سفیر نونگ رونگ سے ملاقات میں کہی جنہوں نے جمعرات کو یہاں وزیر اعظم سے ملاقات کی ۔ ملاقات کے دوران دوطرفہ تعلقات ،

کورونا وائرس کی صورتحال اورغربت کے خاتمے سے متعلق چین کے تجربے پر تبادلہ خیال کیاگیا۔ وزیراعظم عمران خان نے چین سے غربت کے خاتمے کے مقصدکے حصول میں کامیابی پر چینی قیادت کو مبارکباد پیش کی اور اس بات پر زور دیا کہ پاکستان کو غربت کے خاتمے کے ساتھ ساتھ ترقی کیلئے چین کے تجربے سے سیکھنے کی ضرورت ہے وزیراعظم نے کہا کہ پاکستان کو اس وقت کورونا وائرس کی تیسری لہر کا سامنا ہے اورحکومت اس سے نمٹنے کیلئے ضروری اقدامات کررہی ہے اور ملک بھر میں ویکسینیشن شروع کرنے کا منصوبہ رکھتی ہے وزیراعظم نے سی پیک کی اہمیت پر روشنی ڈالی اور اس موقف کو دوہرایا کہ پاکستان سی پیک منصوبوں کو پایہ تکمیل تک پہنچانے کیلئے پرعزم ہے وزیراعظم نے مزید کہا کہ پاکستان کے عوام چینی صدر ژی جنگ پنگ کے جلد سے جلد دورہ پاکستان کے منتظر ہیں چینی سفیر نونگ رونگ نے صدر ژی جنگ پنگ اور وزیراعظم لی کی کیانگ کی جانب سے نیک خواہشات کاپیغام پہنچایا اور پاک چین تعلقات کو مزید مضبوط بنانے کے عزم کو دوہرایا ۔ چینی سفیر نے مزید کہا کہ چین کورونا وائرس وباء کے خاتمے اور ویکسین کی فراہمی کیلئے پاکستان کی ہر ممکن مدد کرے گا سفیر نے وزیراعظم کو دورہ چین کی دعوت بھی دی ۔