اسلام آباد ( آن لائن)سابق وزیر اعظم میاں نواز شریف نے پارٹی کے سینئر نائب صدر اور پی ڈی ایم کے سیکرٹری جنرل شاہد خاقان عباسی کی جانب سے پیپلز پارٹی کو شوکاز نوٹس بھیجنے میں جلد بازی کرنے پر ناراضگی کا اظہار کیا ہے اور ان سے وضاحت بھی مانگی ہے جبکہ پارٹی کے اندر بڑھتی ہوئی تقسیم کا بھی نواز شریف نے سخت نوٹس لیا ہے اور
اختلافات کے خاتمے کے لئے ایک کمیٹی بنائی جائیگی ،پارٹی کے اندر کئی سینئر اراکین نے نواز شریف کی غیر موجودگی میں ن لیگ کو فعال کرنے کے لئے حمزہ شہباز شریف کو موثر کردار دینے کا بھی مطالبہ کیا ہے ۔ذرائع نے بتایا کہ نواز شریف نے شاہد خاقان عباسی سے رابط کیا ہے اور پیپلز پارٹی کو جلد بازی میں شوکاز نوٹس بھجوانے اور دھڑے بندی پر اظہار ناراضگی کیا ہے ،نواز شریف نے اختلافات ختم کرنے کیلئے شاہد خاقان عباسی اور صوبائی صدور کو ہدایات جاری کر دی ہیں ۔ذرائع نے بتایا کہ مسلم لیگ (ن) کے قائد نواز شریف پارٹی میں بڑھتی دھڑے بندیوں پر شدید پریشان ہیں اور دھڑے بندی کے خاتمے کیلئے با اختیار کمیٹی بنانے کا فیصلہ کیا ہے ۔ پارٹی میں اندرونی تقسیم کی وجہ سے پارلیمانی پارٹی کے اجلاس سے بھی اراکین غائب رہنے لگے ہیں ،ذرائع کے مطابق بلوچستان میں ن لیگ کا ڈھانچہ مکمل نہیں ہو سکا ہے ،جمال شاہ کاکڑ کو کئی رہنماؤںنے قائم مقام صدر ماننے سے انکار کر دیا جبکہ سندھ میں بھی ن لیگ
تین حصوں میں تقسیم ہوگئی ہے جو مفتاح اسماعیل کی ضمنی الیکشن میں شکست کا باعث بن سکتی ہے،ملتان،لاہور،فیصل آباد ،راولپنڈی میں دھڑے بندیوں سے ن لیگ کمزور ہونے لگی ہے۔پارلیمنٹ کے اندر بھی شاہد خاقان عباسی اور سعد رفیق گروپس بن چکے ہیں۔ذرائع نے بتایا کہ پارٹی قائدین کی جانب سے پارٹی کے اندر شہباز شریف اور حمزہ شہباز کو مؤثر کردار دینے کے بھی مطالبات زور پکڑ رہا ہے ۔
