اسلام آباد ( آن لائن )ائیرچیف مارشل ظہیر احمد بابر سدھو نے پا ک فضائیہ کے نئے سربراہ کی حیثیت سے ذمہ داریاں سنبھال لیں ہیں۔ پاک فضائیہ کے چاق چوبند دستے نے سلامی پیش کی۔کمانڈ کی تبدیلی کی تقریب ائیر ہیڈ کوارٹر اسلام آباد میں ہوئی۔ پاک فضائیہ میںکمانڈ کی تبدیلی کی تقریب سے سابق پاک فضائیہ مجاہد انور خان نے خطاب کرتے ہو ئے کہا کہ 40سال پاک فضائیہ میں

خدمات انجام دینا اعزاز کی بات ہے۔انہوں نے کہا کہ ہم ہرقیمت پر دشمن کے عزائم ناکام بنائیں گے، قوم کے تعاون سے ملکی دفاع ناقابل تسخیرہے۔کورونا کے باوجود ہم نے دفاعی مشقیں جاری رکھیں۔مجاہد انورخان نے کہا پاک فضائیہ کے ہرسپاہی کوپیشہ ورانہ صلاحیتوں پرخراج تحسین پیش کرتا ہوں۔ پاک فضائیہ ہرچیلنج کے مقابلے کیلیے تیار ہے۔انہوں نے ائیر مارشل ظہیر احمد بابر سدھو کی صلاحیتوں پر اعتماد کا اظہار کیا اور پاک فضائیہ کی قیادت سنبھالنے پر مبارکباد د یتے ہوئے کہا کہ ظہیر احمد بابر کی کمان میں پاک فضائیہ مزید ترقی کرے گا۔ پاک فضائیہ کے نئے سربراہ ظہیر احمد بابر 16 اپریل 1965 کوپیدا ہوئے۔ ائیر چیف مارشل ظہیر احمد بابر نے 1986 میں ائیر فورس کی جی ڈی پی برانچ میں کمیشن حاصل کیا۔ظہیر احمد بابر نے فائٹر اسکواڈرن، آپریشنل ائیر بیس اور ریجنل ائیر کمانڈ کی قیادت کی۔ پاک فضائیہ میں خدمات پر ظہیراحمد بابر کو تمغہ امتیاز، ستارہ امتیازاور ہلال امتیاز سے نوازا گیا ۔ ظہیر احمد بابر ڈپٹی چیف آف ائیر سٹاف ایڈمن کے طور پر کام کر رہے تھے جبکہ وہ فائٹر سکوارڈرن، آپریشنل ائیربیس اور ریجنل ائیر کی کمانڈ بھی کر چکے ہیں۔ اس کے علاوہ ایئر چیف مارشل ظہیر احمد بابر اسسٹنٹ چیف آف ائیر سٹاف آپریشن و ریسرچ اور ترقی کے طور پر بھی خدمات دے چکے ہیں ۔