اسلام آباد(اے پی پی)وزیراعظم عمران خان نے چیئرمین اور ڈپٹی چیئرمین منتخب ہونے پر سینیٹر صادق سنجرانی اور مرزا محمد آفریدی کو مبارکباد دی ہے ۔ہفتہ کو ایک ٹویٹ میں وزیراعظم نے کہا کہ انہیں خوشی ہے کہ بلوچستان اور سابق فاٹا سے ان دو عہدوں پر انتخاب ملک کے
ان علاقوں کو جو پسماندہ ہیں یا ماضی میں ترقی میں پیچھے رہ گئے تھے قومی دھارے میں لانے کی ان کی پالیسی کے مطابق ہے۔دریں اثنا وزیراعظم عمران خان نے کہا ہے کہ ملک میں تعلیم کی اہمیت کو اجاگر کرنا بہت ضروری ہے، کوئی بھی قوم علم کے بغیر ترقی نہیں کر سکتی، دنیا کی تاریخ اٹھا کر دیکھیں اخلاقی اقدار کے بل بوتے پر قوموں نے عروج حاصل کیا اور اخلاقی نظام تباہ ہونے پر وہ معاشرہ تباہ ہوا، القادر یونیورسٹی نوجوان نسل کیلئے رول ماڈل بنے گی، اسلام کے نام پر حاصل کئے گئے ملک اور اقبال کے خواب کی حامل قیادت یہاں سے نکلے گی، مغرب میں ہم سے زیادہ اچھائیاں ہیں، وہاں ادارے مضبوط ہیں، ان کے اخلاق بہتر ہیں، وہاں سچائی ہے لیکن خاندانی نظام اور مذہب سے دوری ان کی تباہی کے اسباب ہیں، علم ہمیں انسان کی کردار سازی اور انسان اور جانور میں فرق بتاتا ہے، ان کے پارلیمان میں ضمیر بیچنے کا تصور بھی نہیں۔ ان خیالات کا ا ظہار وزیراعظم عمران خان نے سیرت النبی ۖ اور صوفیائے کرام کی تعلیمات کے فروغ کے حوالے سے تعمیر کی جانے والی القادر یونیورسٹی کے دورہ کے موقع پرکیا ۔اس موقع پر وزیر اعظم نے القادر یونیورسٹی میں شجر کاری مہم کے تحت پودا لگایا اور یونیورسٹی کے قیام میں پیشرفت کا جائزہ بھی لیا۔
