اسلام آباد،لاہور(این این آئی) وزیراعظم عمران خان نے سینیٹ انتخابات 2018 کے ویڈیو معاملے کی تحقیقات کا فیصلہ کرلیا۔وزیراعظم عمران خان نے ایم پی ایز کے پیسے لینے کی ویڈیو کے معاملے پر تین رکنی کمیٹی بنا دی جس میں وفاقی وزیر سائنس و ٹیکنالوجی فواد چوہدری،
وفاقی وزیر انسانی حقوق ڈاکٹر شیریں مزاری اور وزیراعظم کے مشیرِ داخلہ و احتساب شہزاد اکبر شامل ہیں۔ذرائع کے مطابق کمیٹی تحقیقات کرے گی کہ ویڈیو میں کون کون ملوث ہے اور اپنی سفارشات وزیراعظم کو پیش کرے گی۔ کمیٹی ویڈیو کے معاملے پر الیکشن کمیشن سے رجوع سے متعلق تجاویز بھی دے گی اور ملوث افراد کے خلاف فوجداری کارروائی کے امکانات سے متعلق سفارشات دے گی۔کمیٹی ملوث افراد کے خلاف کیسز نیب، ایف آئی اے اور اینٹی کرپشن کو بھجوانے پر بھی غور کرے گی۔دوسری جانب سینیٹ کے انتخابات میں پیسے کی مداخلت اور ووٹوں کی خرید و فروخت کیخلاف لاہور ہائیکورٹ میں درخواست دائرکر دی گئی ۔ جوڈیشل ایکٹوازم پینل کے سربراہ اظہر صدیق ایڈووکیٹ کے توسط سے دائر درخواست میں الیکشن کمیشن اور دیگر کو فریق بنایا گیا۔ درخواست گزار نے موقف اپنایا کہ سینیٹ کے انتخابات کو شفاف بنانے کیلئے الیکشن کمیشن اپنی ذمہ داری پوری نہیں کر رہا، الیکشن میں ووٹوں کی خرید و
فروخت کیلئے ایک ویڈیو بھی سامنے آ گئی ہے، سینٹ کے انتخابات میں کرپشن، پیسہ کا عمل دخل اور ووٹ کی فروخت کا خدشہ ہے، الیکشن کمیشن کو چٹھی بھی لیکن پیشرفت نہیں کی گئیں،الیکشن کمیشن کو آئینی ذمہ داری پوری کرنے کیلئے پابند کیا جائے، سینیٹ انتخابات میں پیسے کی عمل دخل اور ووٹوں کی فروخت کو روکنے کی ٹھوس اقدامات کیے جائیں۔
