اسلام آباد،لاہور (این این آئی) پاکستان مسلم لیگ (ن)کے سینیٹر آصف کرمانی نے کہا ہے کہ نواز شریف علاج مکمل کروانے کے بعد واپس آ جائیں گے۔ اپنے بیان میں انہوں نے کہاکہ عمران خان بورس جانسن کے ذریعے چینی چور جہانگیر ترین کو واپس لائیں۔انہوں نے کہاکہ مہنگائی کے ھاتھوں عوام چاروں شانے چت ہو چکے ہیں ـ انہوں نے کہاکہ نالائق حکمران ٹولہ عوام کی گردن پر سوارہے، دوسری جانب کوئٹہ روانگی سے قبلن لیگ کی نائب صدر مریم نواز نے کہا کہ سلیکٹڈ کو پتہ ہونا چاہیے کہ برطانیہ قانون کے تحت چلتا ہے، وہاں ارشد ملک
جیسے ججز نہیں ہوتے، وہاں عوام کے ووٹ پر ڈاکا ڈال کر کوئی وزیر اعظم مسلط نہیں کیا جاتا اور دبا ئوکے تحت ججز سے فیصلے نہیں لیے جاتے۔انہوںنے عمران خان کی جانب سے نواز شریف کو واپس لانے کے لئے برطانیہ جانے کے بیان بارے سوال کے جواب میں کہا کہ یہ وہاں جائیں تو انہیں پتہ لگ جائے گا، یہ اپنی جو عزت پاکستان میں کرا چکے ہیں، اگر وہ برطانیہ میں بھی کرانا چاہتے ہیں تو بالکل ایسا کریں۔ایک دفعہ یہ الطاف حسین کو بھی لانے گئے تھے، ان کی بھڑکیںآپ سنا کریں، برطانیہ قانون کے تحت چلنے والا ملک ہے اور وہ اس طرح کی بھڑکوںکو کچھ نہیں سمجھتا۔
