اسلام آباد(مانیٹرنگ ڈیسک)توشہ خانہ ریفرنس میں سابق وزیر اعظم میاں نواز شریف کے ناقابل ضمانت وارنٹ گرفتاری کی کاپیاں جاتی امرا کے باہر چسپاں کر دی گئی ہیں ، نوٹس کے مطابق ملزم جان بوجھ کر کیس میں حاضری سے مفرور ہے ، نوٹس راولپنڈی احتساب عدالت کی جانب سے چسپاں کئے گئے ہیں ، عدالت نے 9ستمبرکو نوازشریف کو مفرور قرار دیا تھا۔

ڈی آئی جی اور سی سی پی او کو ہرصورت میں ملزم کو گرفتار کر کے عدالت میں پیش کرنے کی ہدایت کی گئی ہے ، دریں اثناپاکستان مسلم لیگ(ن) کی نائب صدر مریم نواز نے کہا ہے کہ  پہلے بھی جیلوں میں صعوبتیں برداشت کر رہے ہیں اس لئے ہمیں گرفتاریوں اور جیلوں سے نہ ڈرایا جائے بلکہ ہمار ا خوف تو ختم ہو گیا ہے۔ اپنی رہائشگاہ جاتی امراء سے کراچی روانگی سے قبل میڈیا سے گفتگو کرتے ہوئے مریم نواز نے کہا کہ عمران خان کو بہت غصہ ہے کیونکہ وہ ایک ہارا ہوا شخص ہے ، نواز شریف نے کہا یہ آپ کا کھیل نہیں ، ”بڑوں ” کی لڑائی میں چھوٹوں کا کیا کام ہے ،آپ تو کھیل سے باہر ہیں، نواز شریف نے اپنے خطاب میں عمران خان کو تو مخاطب ہی نہیں کیا ۔ انہوں نے کہا کہ ہمیں پہلے جیلوں میں کونسی سہولتیں ملی ہیں اس لئے دھمکیاں نہ دی جائیں ۔ ہم دو دفعہ جیل کاٹ آئے ہیں اس لئے گرفتاریوں اور جیلوں کا کسے خوف ہے بلکہ ہمارا خوف تو ختم ہو گیا ہے۔ انہوں نے کہاکہ حکومت کو کچھ نظر نہیں آرہا لیکن آئندہ چند روز میں نظر آ جائے گا، پی ڈی ایم کی تحریک چل پڑی ہے اور نتائج کا حصول زیادہ دور نہیں۔

موضوعات:نوازشریف