اسلام آباد (این این آئی) وزیراعظم عمران خان کی زیر صدارت اجلاس میں فیصلہ کیا گیا ہے کہ 25 ہزار روپے سے کم آمدن والے افراد کو راشن کی خریداری میں حکومت معاونت کرے گی۔ تفصیلات کے مطابق پیر کو وزیراعظم عمران خان کی زیر صدارت اجلاس ہوا جس میں وزیراعظم کا کم آمدنی والے افراد کے لئے ایک اور زبردست اقدام اٹھاتے ہوئے فیصلہ کیا گیا کہ 25 ہزار روپے سے کم آمدن والے افراد کو راشن کی خریداری میں حکومت معاونت کرے گی،حکومت آٹا چینی دال اور گھی کی خریداری
میں مدد کرے گی۔ فیصلے سے قبل وزیراعظم نے تمام محکموں سے بریفنگز لیں۔ وزیراعظم نے آئندہ بجٹ میں راشن خریداری کے لئے رقم مختص کرنے کا فیصلہ کرتے ہوئے وزارت خزانہ اور معاشی ٹیم کو خصوصی ہدایات جاری کیں اور کہا کہ اس ملک میں کوئی بھوکا نہیں سوئے گا۔انہوں نے کہا کہ پہلی حکومتیں ایسے طبقے کا احساس نہیں کرتی تھیں،موجودہ حکومت ایسے سفید پوش طبقے کا سہارا بنے گی۔ اجلاس میں فیصلہ کیا گیا کہ وفاق اور صوبے مل کر فیصلے پر عملدرآمد کریں گے۔
