اسلام آباد(مانیٹرنگ ڈیسک)جیو نیوز اور اے آروائی نیوز کے مطابق ترجمان کالعدم تحریک طالبان احسان اللہ احسان حساس آپریشن کے دوران فرار ہوا،میڈیا رپورٹس کے مطابق احسان اللہ احسان نے2017 میں رضاکارانہ طور پر خود کو انٹیلی جنس اداروں کےحوالے کیا، جبکہ اس نے سرنڈر کرنے سےقبل ہی حساس معلومات فراہم کرنا شروع کردی تھیں۔ذرائع کا کہنا ہے کہ ابتدائی تفتیش کےبعد احسان اللہ احسان نے26 اپریل 2017 کو اعترافی بیان دیا۔

جس میں ترجمان تحریک طالبان نے اپنے ہینڈلرز اور سہولت کاروں کو بےنقاب کیا۔ جبکہ دہشت گرد کارروائیوں اور انتہا پسند سوچ کی مذمت بھی کی۔ذرائع کے مطابق احسان اللّہ احسان کی معلومات پر سکیورٹی فورسز نے دہشت گردوں کے نیٹ ورک توڑے اور بہت سے دہشت گردوں کو پکڑا بھی گیا۔ذرائع کا مزید کہنا ہے کہ آپریشنز کو منطقی انجام تک پہنچانے کے لیے اہم معلومات کا حصول ضروری تھا،  کچھ آپریشنز اب بھی جاری ہیں۔