لاہور( این این آئی) پاکستان مسلم لیگ (ق) کے صدر ،سابق وزیراعظم چوہدری شجاعت حسین نے وزیراعظم عمران خان کو مشورہ دیتے ہوئے کہا ہے کہ وہ اتحادیوں پر اعتماداور فسادیوں سے دور رہیں،اپنی اپنی نہیں بلکہ پاکستان کی بولی بولیں۔

عمران خان کو ’’ٹیںکا درس ‘‘دینے والے اتحادیوں سے محبت اور فسادیوں سے دوری کا سبق دیں ۔ عمرہ کی ادائیگی کے لئے سعودی عرب روانگی سے قبل صحافیوں سے گفتگو کرتے ہوئے چوہدری شجاعت حسین نے کہا کہ عمران خان کے ساتھ اتحاد بغیر کسی لالچ کے ملک و قوم کے مفاد میں کیا،اس پر قائم ہیں اور رہیں گے۔ انہوں نے کہا کہ فسادیوں نے ہر دور میں نفرت اور انتشار کی سیاست کی۔ چوہدری شجاعت حسین نے کہا کہ اللہ تعالی نے تین مرتبہ مجھے خانہ کعبہ کے اندر جانے کی سعادت نصیب فرمائی، اپنی معافی کے علاوہ کبھی اپنے لیے دعا نہیں کی، اب بھی انشا اللہ عوام کی خوشحالی کیلئے دعا کروں گا۔ صحافی نے سوال کیا کہ کیا عمرے کے دوران وزیر اعظم عمران خان کیلئے بھی دعا کریں گے جس پر چوہدری شجاعت حسین نے کہا کہ اللہ تعالی عمران خان کوفسادیوں کے نرغے سے دور رکھے، ان لوگوں کیلئے دعا کروں گا جنہوں نے اپنے نام کے ساتھ دعا کی درخواست کی ،خانہ کعبہ کے اندر بھی ہمیشہ عوام کی خوشحالی کیلئے دعا کی۔