راولپنڈی(این این آئی) آرمی چیف جنرل قمرجاوید باجوہ سے روس کی بری افواج کے سربراہ جنرل اولیگ سلیوکوف نے ملاقات کی جس میں سیکیورٹی و تربیتی تعاون سمیت دوطرفہ ملٹری تعلقات کے فروغ کے حوالے سے گفتگو کی گئی۔
منگل کو پاک فوج کے شعبہ تعلقات عامہ (آئی ایس پی آر) کے مطابق سربراہ پاک فوج جنرل قمرجاوید باجوہ سے روس کی بری افواج کے سربراہ جنرل اولیگ سلیوکوف نے ملاقات کی۔ ملاقات میں سیکیورٹی و تربیتی تعاون سمیت دوطرفہ ملٹری تعلقات کے فروغ پر بات چیت کی گئی۔اس موقع پر آرمی چیف جنرل قمر جاوید باجوہ نے کہا کہ پاکستان باہمی تعاون اوربہتر تعلقات پر یقین رکھتا ہے، پاکستان اور روس کے درمیان تعاون سے نہ صرف خطے میں امن کو فروغ ملے گا بلکہ اقتصادی خوشحالی بھی آئیگی۔آئی ایس پی آر کے مطابق روس کی بری افواج کے سربراہ نے دہشت گردی کے خلاف پاک فوج کی کامیابیوں کو سراہتے ہوئے کہاکہ عالمی برداری بھی پاکستان کی کامیابیوں کواہمیت دے۔ انہوں نے کہا کہ روس پاکستان کے ساتھ مزید بہترتعلقات کاخواہاں ہے۔آئی ایس پی آر کے مطابق سربراہ پاک فوج جنرل قمرجاوید باجوہ سے فرانسیسی سیکریٹری جنرل قومی دفاع نے بھی ملاقات کی، ملاقات میں دفاع اور سلامتی سمیت باہمی دلچسپی کیامور پر تبادلہ خیال کیا گیا جب کہ علاقائی سلامتی سے متعلق امور بھی زیرِبحث آئے۔آئی ایس پی آر کے مطابق فرانسیسی سیکریٹری جنرل نے دہشت گردی کے خلاف جنگ اور علاقائی امن واستحکام کے لیے پاک فوج کے کردار کو سراہا۔
