اسلام آباد(سی پی پی) اسلامی نظریاتی کونسل کے چیئرمین قبلہ ایاز نے کہا ہے کہ ریاست مدینہ کاقیام آسان نہیں، اس میں وقت لگے گا، حکومت ٹاسک فورس بنائے تو اسلامی نظریاتی کونسل بھی کردار ادا کرے گی اور ریاست مدینہ کیلئے نتیجہ اخذکرسکیں گے۔ ہمارا عدالتی نظام مہنگا ہونے کے سبب انصاف کاحصول مشکل ہے، ریاست مدینہ کے عدالتی نظام میں انصاف سستا ہوناچاہیے اوربنیادی تعلیم بھی ہر شہری کا حق ہے اور بیروزگاری کے بڑھتے ہوئے
رجحان کاخاتمہ ضروری ہے۔ ڈاکٹر قبلہ ایازکا کہنا ہے کہ ریاست مدینہ کا مقصد فلاحی مملکت کا اعادہ ہے، ریاست مدینہ پر ہماری تجاویز اصولی ہوں گی، حکومت کو ریاست مدینہ کیلئے ٹاسک فورس کی تجویزدی ہے۔ ریاست مدینہ پر ٹاسک فورس ہرشعبے کیلئے کام کرسکتی ہے۔ فی الحال پولیس اورعدالتی نظام ریاست مدینہ کے تقاضوں سے ہم آہنگ نہیں، تعلیمی نظام بھی ریاست مدینہ کے مطابق نہیں ہے، ہمارے یہاں امیر اور غریب کیلئے تعلیم کانظام مختلف ہے۔
