سرینگر،واشنگٹن (این این آئی)مقبوضہ کشمیرمیں سرینگر میں واقع بھارتی فوجی بنکر کے قریب ایک زوردھماکے میں ایک مکان اور ایک گاڑی کو نقصان پہنچاہے۔ کشمیرمیڈیاسروس کے مطابق یہ دھماکہ سرینگر کے علاقے آلوچی باغ میں ہوا جس کی آواز دو ردور تک سنائی دی گئی ۔ دھماکے میں ایک مکان اور اسکے قریب کھڑی ایک گاڑی کو نقصان پہنچا ہے ۔

مقامی افراد کے مطابق بھارتی فوجی بنکر کے قریب دھماکہ اتنا شدید تھا کہ اس سے متعدد گھروں کی کھڑکیاں ٹوٹ گئیں۔دریں اثنا مقبوضہ کشمیرمیں کشمیری عوام نے بھارتی فوجیوں کی طرف سے نہتے کشمیریوں پر تشدد کے خلاف زبردست بھارت مخالف مظاہرے کئے اور بیج بہاڑہ کے قریب سرینگر جموں ہائی وے پر ٹریفک کو بلاک کردیا۔ کشمیرمیڈیاسروس کے مطابق فوجیوں نے جمعرات کی صبح بلا جواز طورپر بیج بہاڑہ میں مقامی لوگوں کو تشدد کا نشانہ بنایا تھا ۔ واقعے کے فورابعد لوگ آزادی کے حق میں اور بھارت کے خلاف نعرے بلند کرتے ہوئے گھروں سے باہر نکل آئے اور انہوں نے سرینگر جموں ہائی وے بند کردی جس کے باعث ٹریفک معطل ہو گئی ۔ پھنسے ہوئے مسافروں نے میڈیا کو بتایا کہ گزشتہ دو گھنٹوں سے شاہراہ پر ٹریفک معطل ہے ۔علاوہ ازیں امریکہ میں قائم ایک تحقیقی ادارے Pewریسرچ کی رپورٹ میں انکشاف کیاگیا ہے کہ بھارتی شہریوں کی 55فیصد اکثریت نے مقبوضہ کشمیر کی صورتحال ایک بڑا مسئلہ قراردیا ہے ۔ کشمیرمیڈیاسروس کے مطابق تحقیقی ادارے کے ایک سروے کے دوران 53فیصد افراد کا کہناتھاکہ گزشتہ پانچ برس کے دوران کشمیرمیں صورتحال ابتر ہوئی ہے ۔

تحقیق پلوامہ واقعے کے بعد بھارت اور پاکستان کے درمیان حالیہ کشیدگی کے بعد تنازعہ کشمیر نے نریندر مودی کیلئے اہم انتخابی مہم کی صورت اختیار کرلی ہے۔ تحقیقی ادارے نے اپنی رپورٹ میں کہاکہ پلوامہ واقعے کے بعد بھارت کی سوشل میڈیا کی مختلف ویب سائیٹوں پر دانستہ طورپر حملے کے حوالے سے گمراہ کن اور بے بنیاد خبریں جاری کی گئی تھیں۔

موضوعات:مقبوضہ کشمیر