اسلام آباد( آن لائن ) وزیراعظم عمران خان نے کہا ہے کہ بھارتی وزیراعظم نریندر مودی ایک ہیجان زدہ شخص ہے ، پلوامہ حملہ مسلم مخالف حکومت اور کشمیر میں سخت پالیسی کا نتیجہ ہے ، مودی کے میزائل حملے سے دونوں ممالک جنگ کے دہانے پر آئے ، ہندوستان میں انتخابات سے پہلے کچھ بھی ہوسکتا ہے ۔
نئے پاکستان میں دہشتگردوں کیلئے کوئی جگہ نہیں اس سے پہلے دہشتگردوں کیخلاف ایسا کریک ڈائون نہیں ہوا تھا ، پاکستان کا جیش محمد سے کوئی تعلق نہیں ہے ۔ ان خیالات کا اظہار وزیراعظم عمران خان نے برطانوی اخبار فنانشل ٹائم کو انٹرویو دیتے ہوئے کیا ۔ انہوں نے کہا کہ بھارتی وزیراعظم نریندر مودی ایک ہیجان زدہ شخص ہے جس نے پلوامہ واقعہ جنگی جنون ثابت کرنے کیلئے اختیار کیا۔ حقیقت میں پلوامہ حملہ مسلم مخالف حکومت اور کشمیر میں سخت پالیسی کا نتیجہ ہے ۔مودی کے میزائل حملے سے دونوں ممالک جنگ کے دہانے پر آئے ہیں۔ بھارت میں انتخابات سے پہلے کچھ بھی ہوسکتا ہے ۔ وزیراعظم نے کہا کہ پاکستان کا جیش محمد سے کوئی تعلق نہیں ہے اور نئے پاکستان میں دہشتگردوں کیلئے بھی کوئی جگہ نہیں ہے۔ سرزمین پاکستان میں دہشتگرد تنظیموں کا گھیرا تنگ کیا جارہا ہے اس سے پہلے دہشتگرد تنظیموں کیخلاف ایسا کریک ڈائون کبھی نہیں ہوا تھا ۔ایک سوال کے جواب میں عمران خان نے کہا کہ یہ تاثر غلط ہے کہ پاکستان چین کی کلائنٹ ریاست بن چکا ہے۔ چین نے ہمیشہ مشکل وقت میں پاکستان کی مدد کی ہے جس پر ہم چین کے شکر گزار ہیں ۔ وزیراعظم نے مزید کہا کہ پاکستانی معیشت کو ترقی دینے کیلئے حکومت پرعزم ہے اور اس دفعہ آخری بار آئی ایم ایف سے رجوع کرنے جارہے ہیں ۔
