اسلام آباد(مانیٹرنگ ڈیسک)بھارتی ہائی کمشنر اجے بساریہ نے کہاہے کہ پاکستان اور بھارت کے درمیان جنگ کا خطرہ ٹل گیا تاہم دہشتگردی کے خطرات ابھی باقی ہیں۔ دونوں ملکوں کے درمیان مختلف سطحوں پر رابطے موجود ہیں تاہم اسلام آباد
اور دہلی کے درمیان باضابطہ مذاکرات الیکشن کے بعد قائم ہونے والی حکومت کے ساتھ ہوں گے۔ روزنامہ جنگ کے مطابق گزشتہ شب اسلام آباد میں ایک سفارتی تقریب میں گفتگو کرتے ہوئے انہوں نے کہا کہ دونوں ملکوں کے درمیان مذاکرات اور مثبت پیشرفت میں سب سے بڑی رکاوٹ دہشتگردی ہے۔ پاکستان نے ایک بار پھر بین لاقوامی سطح پر دہشتگردی کا خاتمہ کرنےکیلئے اقدامات کی یقین دہانی کرائی ہے گوکہ پاکستان کا کہنا ہے کہ دہشتگردتنظیموں پر پابندی اور ایسے واقعات کی وجہ بننے والے افراد کے خلاف نیشنل ایکشن پلان کے تحت عملدرآمد خود پاکستان اپنے مفاد میں کررہا ہے ۔ بہرحال ہم اس کی ستائش کرتے ہیں لیکن ہم یہ بھی چاہتے ہیں کہ ایسے اقدامات دیرپا ہونے چاہئیں ناکہ ماضی کی طرح چند ماہ کیلئے،واضح رہے کہ دونوں ممالک کے درمیان اس وقت کشیدگی عروج پر ہے ،وزیر اعظم عمران خا ن کئی مواقع پر بھارت کو خطرہ قرار دیتے ہوئے چوکنا رہنے کا کہہ چکے ہیں۔
