نئی دہلی(اے این این ) بھارتی وزیرِ اعظم نریندر مودی کا پروپیگنڈا انہی کے گلے پڑ گیا جس کے بعد نریندر مودی نے بلیک میلنگ کا سہارا لیتے ہوئے کہا ہے کہ جو بھارتی بالا کوٹ حملے کا ثبوت مانگے گا وہ ملک دشمن ہے۔تفصیلات کے مطابق بھارتی اپوزیشن کی جانب سے بھی بالاکوٹ میں کامیابی کے دعوئوں پر ثبوت کا مطالبہ کیا جارہاہے۔

نریندر مودی سے ثبوت مانگنے پر ان کے گلے میں ہڈی پھنس گئی، انہیں کچھ نہ سوجھی تو اپوزیشن پر ملک دشمنی کا الزام لگادیا۔مودی کا کہنا ہے کہ بالاکوٹ حملے کا ثبوت مانگنے والے دشمن کو خوش کررہے ہیں جبکہ ایسے مطالبات فوج کا مورال ڈا ئون کرنے کے مترادف ہیں۔بھارت میں مودی کو شدید تنقید کا نشانہ بنایا جا رہا ہے اور ان کے پروپیگنڈے سے پردے اٹھائے جا رہے ہیں۔مقبوضہ کشمیر کی سابق وزیراعلی محبوبہ مفتی نے بالا کوٹ حملے پر سوال اٹھانے والوں کو غدار کہنے کو بچگانہ عمل قرار دیا اور کہا کہ جنگی جنون کو حب الوطنی کی پہچان بنادیا گیاہے۔ان کا کہنا تھا کہ ثبوت سامنے لانے اور سوالوں کے جواب دینے کے بجائے مودی نے بلیک میلنگ کے ذریعے انہیں دبانے کی کوشش کی ہے۔کرناٹک میں حکمران جماعت کے ریاستی سربراہ بی ایس یے دیورپانے کہا کہ 44 فوجیوں کی لاشیں 22 سیٹوں کے لیے تھیں۔ کرناٹک کے وزیر پریانک خرگے نے کہا کہ لوگ پلوامہ حملے کو سازش قرار دے رہے ہیں، جلد سچ سامنے آجائے گا۔اتر پردیش کی سابق وزیراعلی مایا وتی اور دلی کی سابق وزیر اعلی شیلا ڈکشٹ نے موجودہ حالات کو مودی کے لیے سیاسی فائدے کا ذریعہ قرار دیا۔