اسلام آباد (مانیٹرنگ ڈیسک) سابق آرمی چیف راحیل شریف کو توسیع نہ دینے پر سابق ڈی جی آئی ایس آئی نے کس کو اغواء کروایا، ایک نجی ٹی وی چینل کے پروگرام میں اس بات کا انکشاف کرتے ہوئے اسحاق ڈار نے کہا کہ توسیع نہ دینے پر ان کے خانسامہ کو اغوا کیا گیا لیکن اس معاملے میں جنرل راحیل شریف بے قصور ہیں۔
پروگرام میں جب اینکر نے اسحاق ڈار سے سوال کیا کہ آپ کا خانسامہ بھی تو اٹھایا گیا تھا؟ جس کا جواب دیتے ہوئے انہوں نے کہا کہ اس لیے اٹھایا گیا کہ سابق آرمی چیف جنرل راحیل شریف کو توسیع نہیں ملی تھی اگر ان کو توسیع مل جاتی تو اس وقت کے ڈی جی آئی ایس آئی اگلے سال چیف آف آرمی سٹاف بن سکتے تھے کیونکہ وہ سب سے سینئر تھے۔ اسحاق ڈار نے گفتگو کرتے ہوئے کہا کہ میں پیرس میں فرانسیسی صدر کے ساتھ میٹنگ کر رہا تھا جب مجھے یہ پیغام ملا کہ میرا خانسامہ گھر کے لیے نکلا مگر اسے راستے میں ہی اٹھا لیا گیا ہے، اسحاق ڈار نے کہا کہ میں نے پیرس سے ہی اس وقت کے آرمی چیف کو فون کیا اور اس فون کے اڑتالیس گھنٹے کے بعد صبح کے وقت خانسامے کو اس کے گاؤں کے باہر پھینک دیا گیا، اسحاق ڈار نے گفتگو کرتے ہوئے کہا کہ مجھے یقین ہے کہ آرمی چیف کا خانسامہ کے بازیاب ہونے میں کردار رہا ہو گا۔ اسحاق ڈار نے کہا کہ جب میں نے پاکستان آ کر رپورٹ لی تو یہ ہی پتہ چلا کہ یہ کام ایک ایجنسی نے کیا تھا، سابق وفاقی وزیر خزانہ نے کہا کہ میں نے موجودہ آرمی چیف جنرل قمر جاوید باجوہ کو بھی یہ بات بتائی اور بعد میں انہوں نے اس بات کی تصدیق کی کہ وہ صاحب اس کام میں ملوث تھے۔ انہوں نے کہا کہ اس وقت کے ڈی جی آئی ایس آئی لیفٹیننٹ جنرل رضوان اختر نے یہ کام کروایا تھا، اس میں سابق آرمی چیف جنرل راحیل شریف شامل نہیں تھے۔
